முன்னாள் அமைச்சர் சிவசங்கர் உள்ளிட்டோர் மீது 3 கோடியே 35 லட்சம் ரூபாய் பண மோசடி புகார் அளிக்கப்பட்டுள்ளது.
சென்னை கே.கே.நகரைச் சேர்ந்த தொழிலதிபர் அருண் ராஜ் என்பவர், சென்னை காவல் ஆணையர் அலுவலகத்தில் புகார் அளித்துள்ளார். அதில், முன்னாள் அமைச்சர் சிவசங்கர், சிவனேசன் மற்றும் சிவசங்கரின் உதவியாளர் லூயிஸ் என்ற கதிரவன் ஆகியோர், தன்னிடம் பண மோசடி செய்துள்ளதாக குற்றம் சாட்டியுள்ளார்.
அரசு ஒப்பந்தங்கள், மணல் மற்றும் ஜல்லி குவாரி தொழில் செய்து தருவதாகக் கூறி பணம் பெற்றதாகவும், 9 லாரிகளையும் பயன்படுத்தி ஏமாற்றியதாகவும் புகார் தெரிவித்துள்ளார்.
3 கோடியே 35 லட்சம் ரூபாய் பண மோசடி விவகாரம் தொடர்பாக திமுக தலைவர் ஸ்டாலினின் மனைவி துர்கா ஸ்டாலினை மூன்று முறை நேரில் சந்தித்து புகார் கொடுத்தும் பணம் திருப்பி தரப்படவில்லை என்று, பாதிக்கப்பட்ட அருண் ராஜின் மனைவி சங்கீதா தெரிவித்துள்ளார்.
