திருச்செந்தூர் முருகன் கோயில் கந்தசஷ்டி திருவிழாவின் 4ஆம் நாள் நிகழ்ச்சியில் அதிகாலை முதலே நீண்டவரிசையில் காத்திருந்து ஆயிரக்கணக்கான பக்தர்கள் சாமி தரிசனம் செய்தனர்.
முருகப்பெருமானின் அறுபடை வீடுகளில் இரண்டாம் படை வீடான திருச்செந்தூர் சுப்பிரமணிய சுவாமி கோயிலில் கந்த சஷ்டி விழா, யாகசாலை பூஜையுடன் தொடங்கி நடைபெற்று வருகிறது. கந்தசஷ்டி திருவிழாவின் நான்காம் நாள் நிகழ்ச்சியை முன்னிட்டு அதிகாலை 3 மணிக்கு கோயில் நடை திறக்கப்பட்டது.
தொடர்ந்து விஸ்வரூப தரிசனம், உதயமார்த்தாண்ட அபிஷேகம் மற்றும் தீபாராதனை காண்பிக்கப்பட்டது. இதையடுத்து யாகசாலையில் சுவாமி ஜெயந்திநாதர் வள்ளி, தெய்வானையுடன் எழுந்தருளிய நிலையில், யாகசலை பூஜைகள் நடைபெற்றன.
கந்தசஷ்டி திருவிழாவை முன்னிட்டு தமிழகத்தின் பல்வேறு மாவட்டங்களில் இருந்து வருகை தந்துள்ள ஆயிரக்கணக்கான பக்தர்கள் அதிகாலை முதலே நீண்டவரிசையில் காத்திருந்து சாமி தரிசனம் செய்தனர்.
