டாஸ்மாக் மதுபானக் கடைகளில் 10 ரூபாய் கூடுதலாக வசூலிக்கும் அறிவிப்பை எதிர்த்து தொடரப்பட்ட வழக்கில், தமிழக அரசு பதிலளிக்க சென்னை உயர்நீதிமன்றம் உத்தரவிட்டுள்ளது.
டாஸ்மாக் கடைகளில் காலி மதுபானப் பாட்டில்களைத் திரும்பப் பெறும் திட்டத்தை அறிமுகப்படுத்திய தமிழக அரசு, பாட்டில்களைத் திரும்ப ஒப்படைக்கும் வாடிக்கையாளர்களுக்கு 10 ரூபாய் வழங்கும் நடைமுறையைச் செயல்படுத்தி வருகிறது.
இதற்காக, மதுபானம் கொள்முதல் செய்யும்போதே கூடுதலாக 10 ரூபாய் வசூலிக்க வேண்டும் என கடந்த 2022-ம் ஆண்டு அரசு அறிவுறுத்தியிருந்தது.
அரசின் இந்த அறிவிப்பை எதிர்த்து, எஃப்.எல்.2 மற்றும் எஃப்.எல்.3 உரிமம் பெற்ற கிளப்கள் மற்றும் நட்சத்திர விடுதிகள் சென்னை உயர்நீதிமன்றத்தில் வழக்குத் தொடர்ந்தன.
கிளப்களில் மதுபானப் பாட்டில்களை வாங்கும் வாடிக்கையாளர்கள், அவற்றைத் திரும்ப ஒப்படைக்காமல் வீடுகளுக்கே எடுத்துச் செல்வதாக மனுவில் தெரிவிக்கப்பட்டிருந்தது.
இதனால், காலி மதுபானப் பாட்டில்களைத் திரும்ப ஒப்படைக்க முடியாத நிலை ஏற்படுவதாகவும் மனுதாரர்கள் குறிப்பிட்டிருந்தனர்.
இந்த வழக்கை விசாரித்த நீதிபதி என். செந்தில்குமார், தமிழக அரசு மற்றும் டாஸ்மாக் நிர்வாகம் பதிலளிக்க உத்தரவிட்டு, விசாரணையை அடுத்த வாரத்துக்கு ஒத்திவைத்தார்.
