மதுரை தனிஷ்க் நகைக் கடை கொள்ளை வழக்கில் தலைமறைவாக இருந்த யூடியூபர் நிஷாந்த் கைது செய்யப்பட்டுள்ளார்.
மதுரையில் உள்ள தனிஷ்க் நகைக்கடையில் கடந்த 12-ம் தேதி 15 கிலோ தங்க நகைகள் கொள்ளையடிக்கப்பட்டன. இந்த வழக்கில் முக்கிய குற்றவாளியான யூடியூபர் நிஷாந்தை,
கடந்த 5 நாட்களாக சேலம், தருமபுரி, ஓசூர், பெங்களூரு உள்ளிட்ட பகுதிகளில் தனிப்படை போலீசார் தீவிரமாகத் தேடி வந்தனர்.
இந்த நிலையில், பெங்களூருவில் இருந்து சேலம் நோக்கிச் சென்ற ஆம்னி பேருந்தில் நிஷாந்த் பயணித்துள்ளார். அவரது நடவடிக்கையில் சந்தேகமடைந்த பேருந்து ஓட்டுநர், அதியமான்கோட்டை போலீசாருக்குத் தகவல் அளித்துள்ளார்.
இதையடுத்து சேசம்பட்டி பைபாஸ் பகுதியில் பேருந்தை மடக்கி நிஷாந்தை போலீசார் கைது செய்ய முயன்றனர். அப்போது, ஜன்னல் வழியாகத் தப்பியோட முயன்ற நிஷாந்தை, போலீசார் சுற்றிவளைத்துப் பிடித்தனர்.
அதனைத்தொடர்ந்து, கொள்ளைச் சம்பவத்தில் வேறு யாருக்கேனும் தொடர்பு உள்ளதா என்பது குறித்து போலீசார் தீவிர விசாரணை மேற்கொண்டு வருகின்றனர். ஏற்கனவே இந்த வழக்கில் நிஷாந்தின் தந்தை சுரேஷ் மற்றும் தோழி மீனாட்சி ஆகியோர் கைது செய்யப்பட்டு 15 கிலோ தங்க நகைகள் மீட்கப்பட்டுள்ளது குறிப்பிடத்தக்கது.
















