சீனாவில் படித்த இளைஞர்கள் எதிர்கொள்ளும் தீவிர வேலைவாய்ப்பின்மை நெருக்கடி குறித்து பதிவிட்டுள்ள ZOHO நிறுவனர் ஸ்ரீதர் வேம்பு, எதிர்காலத்தில் இந்தியாவும் இதே போல் கடுமையான சிக்கலைச் சந்திக்க வாய்ப்புள்ளதாக எச்சரித்துள்ளார். அது பற்றிய ஒரு செய்தி தொகுப்பு.
உலகின் உற்பத்தி மையமாகவும், சுமார் 1.2 ட்ரில்லியன் டாலர் வர்த்தக உபரியைக் கொண்டிருக்கும் சீனாவில் கூட, 20 முதல் 24 வயதுக்குட்பட்ட வேலை இல்லாதவர்களில் சுமார் 70 சதவீதம் பேர் பல்கலைக்கழகப் பட்டம் பெற்றவர்களாக உள்ளனர் என்ற முரண்பாட்டை சுட்டிக்காட்டியுள்ள ஸ்ரீதர் வேம்பு. கல்வித் தகுதிகள் நிலையான பணி வாழ்க்கைக்கு உத்தரவாதம் அளிக்கும் நிலையில் இல்லை என்பதைக் குறிப்பிட்டுள்ளார்.
வளர்ந்து வரும் சவால் குறித்து தனது எக்ஸ் பக்கத்தில் விரிவாக பதிவிட்டுள்ள ஸ்ரீதர் வேம்பு, சீனாவின் வேலைவாய்ப்புச் சூழல் ஒரு விசித்திரமான முரண்பாட்டைக் காட்டுவதாக கூறியுள்ளார்.
வலிமையான உற்பத்தித் துறையை உருவாக்கி, பல்வேறு துறைகளில் தொழில்நுட்பத் திறன்களை வளர்த்து, உலகளாவிய ஏற்றுமதியில் முக்கிய இடத்தைப் பிடித்துள்ள போதிலும் அவையெல்லாம் சீனாவின் இளம் தலைமுறையினருக்குத் தகுந்த வேலைவாய்ப்புகளை உருவாக்கவில்லை என்று ஸ்ரீதர் வேம்பு தெரிவித்துள்ளார்.
உலகெங்கிலும் உள்ள நவீன கல்வி அமைப்புகளும் பொருளாதாரக் கட்டமைப்புகளும், மாணவர்களை பெரும்பாலும் வழக்கமான வேலைவாய்ப்புகளுக்காகவே தயார்படுத்தி வருவதாகவும் இத்தகைய அமைப்புகளில், ஒரு பட்டப்படிப்பை முடித்த பிறகு, நிலையான மாத ஊதியம் கிடைக்கும் வேலை கிடைப்பதே வழக்கமான எதிர்பார்ப்பாக உள்ளதாகவும், ஆனால் இத்தகைய வழக்கமான கணினி மற்றும் தகவல் தொழில்நுட்ப வேலைவாய்ப்புகள் அனைத்தும் ஆட்டோமேஷன் மற்றும் AI தொழில்நுட்பங்களால் பெரும் அச்சுறுத்தலை எதிர்கொண்டுள்ளன என்று விளக்கியுள்ள ஸ்ரீதர் வேம்பு, இந்தச் சிக்கல் சீனாவுக்கு மட்டும் உரியதல்ல என்றும் கூறியுள்ளார்.
AI தொழில்நுட்ப வளர்ச்சியால், முன்பு 10 பேர் செய்ய வேண்டிய வேலையைத் தற்போது திறமையான ஒரே ஒரு நபரால் செய்ய முடிகிறது என்றும், இதனால் பாரம்பரிய வேலைவாய்ப்புகள் இனி வரும் ஆண்டுகளில் எதிர்பார்த்த வேகத்தில் வளராது என்றும் ஸ்ரீதர் வேம்பு சுட்டிக் காட்டியுள்ளார்.
முறையான கல்வித் தகுதிகளுடன், நடைமுறை வணிகத் திறன்கள், வாய்ப்புகளைக் கண்டறியும் திறன் மற்றும் தொழில்முனைவோருக்கான மனநிலை ஆகியவை வரும் காலங்களில் மிக முக்கியமானவையாக மாறக்கூடும் என்பதால் மக்கள் சொந்தமாகத் தொழில் தொடங்கவும், சுதந்திரமாகச் செயல்படவும், தமக்கான வருமான ஆதாரங்களை உருவாக்கிக்கொள்ளவும் அதிக வாய்ப்புகள் உருவாக்கப்பட வேண்டும் என்றும் ஸ்ரீதர் வேம்பு குறிப்பிட்டுள்ளார்.
எடுத்துக்காட்டாக அமெரிக்காவில் 20-ஆம் நூற்றாண்டின் இடைப்பகுதி வரை, தனிப்பட்ட வணிகங்களும் தொழில்முனைவு முயற்சிகளுமே செல்வத்தை உருவாக்குவதிலும் வேலைவாய்ப்புகளை வழங்குவதிலும் முக்கியப் பங்காற்றியுதையும் ஸ்ரீதர் வேம்பு சுட்டிக் காட்டியுள்ளார்.
இளைஞர்கள் வெறும் மாதச் சம்பள வேலைகளை மட்டுமே நம்பியிருக்காமல், சுயதொழில் செய்யும் பாதையில் செல்ல தயாராக வேண்டும் என்று கூறியுள்ள ஸ்ரீதர் வேம்பு, ஒரு முழு தலைமுறையினரையும், தங்களுக்கான வாய்ப்புகளைத் தாங்களே உருவாக்கிக்கொள்ளும் வகையில் தயார்படுத்துவதை ஊக்குவிக்கும் வகையில் மத்திய அரசு உடனடியாக எச்சரிக்கையுடன் செயல்பட வேண்டும் என்றும் கேட்டுக் கொண்டுள்ளார்.
