குடியாத்தம் அருகே முன்விரோதம் காரணமாக நாட்டு துப்பாக்கியால் ஒருவர் சுட்டுக்கொல்லப்பட்ட சம்பவம் அதிர்ச்சியை ஏற்படுத்தியுள்ளது.
வேலூர் மாவட்டம், குடியாத்தம் அருகே சேங்குன்றம் பேருந்து நிலையம் அருகே ஞானவேல் என்பவர் தனது நண்பர் ரகுவுடன் பேசிக்கொண்டிருந்தார். அப்போது, அங்கு வந்த அதே பகுதியைச் சேர்ந்த ரவுடி பூவரசன் நாட்டுத் துப்பாக்கியால் இருவரையும் சரமாரியாகச் சுட்டுவிட்டுத் தப்பியதாகக் கூறப்படுகிறது.
இதில், ஞானவேல் சம்பவ இடத்திலேயே உயிரிழந்த நிலையில், படுகாயமடைந்த ரகு மருத்துவமனையில் அனுமதிக்கப்பட்டார். இதனை அடுத்து வழக்குப் பதிவு செய்த போலீசார், பூவரசனைக் கைது செய்தனர்.
அவரிடம் இருந்து துப்பாக்கி மற்றும் தோட்டாக்களைப் பறிமுதல் செய்வதற்காக சேங்குன்றம் மலைப்பகுதிக்கு அழைத்துச் சென்றபோது, உதவி ஆய்வாளர் ராஜாவைத் தாக்கிவிட்டு பூவரசன் தப்பியோட முயன்றதாகக் கூறப்படுகிறது.
அப்போது போலீசார் துப்பாக்கியால் சுட்டதில், பூவரசனின் வலது காலில் காயம் ஏற்பட்டது. அவரும், தாக்குதலில் காயமடைந்த உதவி ஆய்வாளர் ராஜாவும் குடியாத்தம் அரசு மருத்துவமனையில் சிகிச்சை பெற்று வருகின்றனர்.
கொலை செய்யப்பட்ட ஞானவேலின் உறவினர்கள் மருத்துவமனையில் திரண்டதால், போலீசார் பாதுகாப்பு பணியில் ஈடுபட்டுள்ளனர்.
