தேனியில் கொல்லப்பட்ட சிறப்பு சார்பு ஆய்வாளர் செந்தில்குமாரின் உடல், முழு அரசு மரியாதையுடன் தகனம் செய்யப்பட்டது.
தேனி சமதர்மபுரம் பகுதியில் மதுபோதையில் இருந்த சில இளைஞர்கள் சாலையை மறித்து பட்டாசு வெடித்து ரீல்ஸ் எடுத்ததை தட்டிக்கேட்ட சிறப்பு சார்பு ஆய்வாளர் செந்தில்குமார் தாக்கப்பட்டு சிகிச்சை பலனின்றி உயிரிழந்தார். இதுதொடர்பாக 6 பேரை காவல்துறையினர் கைது செய்து விசாரணை நடத்தி வருகின்றனர்.
இதனிடையே, பிரேதப் பரிசோதனைக்குப் பின் செந்தில்குமாரின் உடல் அல்லிநகரத்தில் உள்ள அவரது இல்லத்திற்கு கொண்டு வரப்பட்டது.
தேனி மாவட்ட காவல் கண்காணிப்பாளர் பிரவீன் கௌதம் உள்ளிட்ட அதிகாரிகள் மலர் வளையம் வைத்து அஞ்சலி செலுத்தினர்.
அரசு சார்பில் 40 லட்சம் ரூபாய் நிவாரணம் அறிவிக்கப்பட்ட நிலையில், முதற்கட்டமாக ஐந்து லட்சம் ரூபாய்க்கான காசோலை குடும்பத்தினரிடம் வழங்கப்பட்டது.
செந்தில்குமாரின் உடலுக்கு கம்பம் எம்எல்ஏ ஜெகநாத் மிஸ்ரா மற்றும் பொதுமக்கள் அஞ்சலி செலுத்தினர். இதனைத் தொடர்ந்து, காவல்துறை சார்பில் 21 குண்டுகள் முழங்க செந்தில்குமாரின் உடல் தகனம் செய்யப்பட்டது.
