48 மணி நேரத்திற்கும் மேலாக காவலில் இருந்தால் அரசு ஊழியர் தற்காலிகப் பணியிடை நீக்கம் செய்யப்பட்டதாகவே கருதப்படுவார் என உச்சநீதிமன்றம் விளக்கமளித்துள்ளது.
பீகார் மாநிலம் சமஸ்திபூரில் உள்ள சதர் மருத்துவமனை மேலாளர் 4 ஆயிரம் ரூபாய் லஞ்சம் பெற்றதாக ஊழல் தடுப்புச் சட்டத்தின் கீழ் வழக்குத் தொடரப்பட்டது.
மருத்துவமனை மேலாளருக்கு அமர்வு நீதிமன்றம் வழங்கிய ஜாமினை பாட்னா உயர்நீதிமன்றம் ரத்து செய்தது.
இந்த உத்தரவுக்கு எதிராக உச்சநீதிமன்றத்தில் மேல்முறையீட்டு மனுதாக்கல் செய்யப்பட்டது. இந்த வழக்கு உச்சநீதிமன்ற நீதிபதிகள் ஜே.பி.பர்திவாலா, மன்மோகன் ஆகியோர் அடங்கிய அமர்வில் விசாரணைக்கு வந்தது.
அப்போது, அரசு ஊழியர் 48 மணி நேரத்திற்கும் மேலாகக் காவலில் இருந்தால், அவர் தானாகவே தற்காலிகப் பணியிடை நீக்கம் செய்யப்பட்டதாகக் கருதப்படுவார் என நீதிபதிகள் விளக்கமளித்தனர்.
மேலும், ஓராண்டுக்குப் பிறகு ஜாமினை ரத்து செய்த பாட்னா உயர்நீதிமன்ற உத்தரவை ரத்து செய்த நீதிபதிகள், பணியிடை நீக்கம் ரத்தான பிறகு குற்றம்சாட்டப்பட்டவர் மீண்டும் அதே மருத்துவமனையில் மேலாளராகப் பணியமர்த்தப்பட்டது குறித்து அதிருப்தி தெரிவித்தனர்.
மேலாளர் பணியமர்த்தப்பட்ட விவகாரம் தொடர்பாக அரசு விசாரணை நடத்தவும் நீதிபதிகள் உத்தரவிட்டனர்.
