மதுரை மாவட்டம் செக்கானூரணி காவல் நிலையத்தின் கழிப்பறையில் லாரி ஓட்டுநர் சடலமாக கண்டெடுக்கப்பட்ட சம்பவத்தை சிபிசிஐடி விசாரணைக்கு மாற்றம் செய்து ஐஜி உத்தரவிட்டுள்ளார்.
உத்தமபாளையத்தைச் சேர்ந்த ஓட்டுநர் பாலகிருஷ்ணன் என்பவருக்கு சொந்தமான லாரி அண்மையில் தீப்பிடித்து எரிந்தது. இந்த சம்பவம் தொடர்பாக வாலாந்தூர் காவல் நிலையத்தில் வழக்குப் பதிவு செய்யப்பட்டிருந்த நிலையில் விசாரணைக்காக செக்கானூரணி காவல் நிலையத்திற்கு பாலகிருஷ்ணன் சென்றிருந்தார்.
பின்னர் சிறிது நேரத்திலேயே பாலகிருஷ்ணன் கழிப்பறையில் தூக்கில் சடலமாக தொங்கியுள்ளார். இதனைக் கண்டு அதிர்ச்சியடைந்த போலீசார் அவரது உடலை மீட்டு உடற்கூராய்வுக்காக மதுரை அரசு ராஜாஜி மருத்துவமனைக்கு அனுப்பி வைத்தனர்.
இந்த சம்பவம் குறித்து போலீசார் விசாரணை நடத்தி வந்தனர். இதற்கிடையே வழக்கு விசாரணையை சிபிசிஐடி பிரிவுக்கு மாற்றி தென் மண்டல காவல்துறை ஐஜி விஜேந்திர பிதாரி உத்தரவிட்டுள்ளார்.
லாரி ஓட்டுநர் மர்ம மரணமடைந்த சம்பவத்தில் காவல் நிலையத்தை முற்றுகையிட்டு உறவினர்கள் மற்றும் பொதுமக்கள் வாக்குவாதத்தில் ஈடுபட்டனர். விசாரணைக்காக இங்கு வந்த லாரி ஓட்டுநர் பாலகிருஷ்ணன் மர்மமான முறையில் சடலமாக தூக்கில் தொங்கியுள்ளார்.
இந்த சம்பவம் அப்பகுதி மக்கள் மற்றும் சக ஓட்டுநர்கள் மத்தியில் கடும் கொந்தளிப்பை ஏற்படுத்திய நிலையில் காவல்நிலையத்தை அவர்கள் சூழ்ந்துகொண்டு வாக்குவாதத்தில் ஈடுபட்டனர் அப்போது பேசிய பொதுமக்கள் செக்கானூரணி காவல் ஆய்வாளர் முத்து பொய்வழக்கு பதிவு செய்வதில் வல்லவர் என குற்றஞ்சாட்டினர்.
