உலகக் கோப்பை செஸ் போட்டி, அஜர்பைஜானின் பாகு நகரில் நேற்று முன்தினம் நடந்தது.
இதில், இளவயது செஸ் வீரரான தமிழகத்தைச் சேர்ந்த பிரக்ஞானந்தா, 2-ம் இடம் பெற்றார்.
உலகின் நம்பர் 1 செஸ் வீரரான நார்வே நாட்டின் கார்ல்சனும், பிரக்ஞானந்தாவும் இறுதிப்போட்டியில் மோதினர்.
இதில், முதல் 2 சுற்றுப் போட்டிகளும் சமனில் முடிந்தன. எனவே, டை பிரேக்கர் சுற்று நடந்தது. இதில், முதற்சுற்று போட்டியில் கார்ல்சன் வெற்றிபெற, 2-வது சுற்று டிராவில் முடிந்தது. இந்த சூழலில், 3-வது சுற்றுப் போட்டியிலும் கார்ல்சன் வெற்றிபெற்றார்.
இதன் மூலம், உலகக் கோப்பை போட்டியில் 2-ம் இடம் பெற்றார். அதேசமயம், அடுத்தாண்டு ஏப்ரல் 2 முதல் 25-ம் தேதி வரை கனடாவின் டொராண்டோ நகரில் நடைபெறவிருக்கும் கேண்டிடேட்ஸ் செஸ் தொடருக்கு தகுதிப் பெற்றிருக்கிறார். இந்தச் சூழலில்தான், பிரக்ஞானந்தாவின் பெற்றோருக்கு மின்சாரக் காரைப் பரிசளிக்கப்போவதாக பிரபல தொழிலதிபர் மகேந்திரா அண்ட் மகேந்திரா நிறுவனத்தின் தலைவர் ஆனந்த் மகேந்திரா தெரிவித்திருக்கிறார்.
இதுகுறித்து தனது எக்ஸ் பக்கத்தில், “பிரக்ஞானந்தாவுக்கு பலரும் மஹிந்திரா தார் காரைப் பரிசளிக்க வேண்டும் என கோருகிறார்கள். அவர்களது உணர்வு எனக்குப் புரிகிறது. ஆனால், என்னிடம் மற்றொரு யோசனை உள்ளது.
Appreciate your sentiment, Krishlay, & many, like you, have been urging me to gift a Thar to @rpragchess
But I have another idea …
I would like to encourage parents to introduce their children to Chess & support them as they pursue this cerebral game (despite the surge in… https://t.co/oYeDeRNhyh pic.twitter.com/IlFIcqJIjm— anand mahindra (@anandmahindra) August 28, 2023
வீடியோ கேம்களின் மோகம் அதிகரித்துள்ள போதிலும், பெற்றோர்கள் தங்கள் குழந்தைகளுக்குச் செஸ் விளையாட்டை அறிமுகப்படுத்தி அவர்கள் இந்த விளையாட்டைத் தொடர ஊக்கப்படுத்துவதை விரும்புகிறேன்.
இது மின்சாரக் கார்களைப் போலவே நமது கிரகத்திற்கும், சிறந்த எதிர்காலத்திற்குமான முதலீடு. எனவே, பிரக்ஞானந்தாவின் பெற்றோருக்கு எக்ஸ்.யூ.வி 400 இ.வி. காரைப் பரிசளிக்க வேண்டும் என்று நினைக்கிறேன்.
பிரக்ஞானந்தாவின் பெற்றோர் தங்கள் மகனின் ஆர்வத்தை வளர்த்ததற்காகவும், அயராத ஆதரவை வழங்கியதற்காகவும் இரமேஷ்பாபு நாகலட்சுமி ஆகியோர் நம் நன்றிக்கு உரியவர்கள்” என்று தெரிவித்திருக்கிறார்.
