வேளாண் விஞ்ஞானியான எம்.எஸ். சுவாமிநாதன் வயது மூப்பு காரணமாக, சென்னையில் இன்று காலை 11.20 மணியளவில் காலமானார். அவருக்கு வயது 98.
மான்கொம்பு சாம்பசிவம் சுவாமிநாதன் என்ற இயற்பெயரைக் கொண்ட எம்.எஸ். சுவாமிநாதன், கடந்த 1925 -ம் ஆண்டு ஆகஸ்ட் 7 -ம் தேதி கும்பகோணத்தில் பிறந்தார்.
தனது சொந்த ஊரிலேயே பள்ளிப் படிப்பை முடித்தார். பல்வேறு கல்லூரிகளில் உயர்கல்வி பயின்ற அவர், கேம்ப்ரிட்ஜ் பல்கலைக்கழகத்தில் முனைவர் பட்டம் பெற்றார். நாட்டில், அரிசி தட்டுப்பாட்டை நீக்க நவீன வேளாண் அறிவியல் முறைகளைக் கண்டறிந்தார்.
இந்தியாவின் பசுமைப்புரட்சியை முன்னின்று நடத்திய எம்.எஸ். சுவாமிநாதன், சர்வதேச அளவில் புகழ் பெற்றார். இந்திய வேளாண் ஆராய்ச்சி கவுன்சில் தலைவராக 1972 -ம் ஆண்டு முதல் 1979 -ம் ஆண்டு வரை பதவி வகித்தார்.
பிலிப்பைன்ஸ் நாட்டில் உள்ள சர்வதேச நெல் ஆராய்ச்சி நிறுவனத்தின் (IRRI) டைரக்டர் ஜெனரலாகவும், க்வாஷ் மாநாடுகள் மற்றும் இயற்கை பாதுகாப்புக்கான சர்வதேச ஒன்றியத்தின் (IUCN) தலைவராகவும் பதவி வகித்தார். ஆசியாவின் நோபல் விருது எனப் போற்றப்படும் மகசேசே விருது உள்ளிட்ட பல்வேறு விருதுகளைப் பெற்றுள்ளார்.
1999 -ல் வெளியான டைம்ஸ் இதழின் சிறந்த 20 ஆசிரியர்கள் எனும் கவுரவத்திற்குத் தேர்வான 3 ஆசிரியர்களில் இவரும் ஒருவர்.
எம்.எஸ். சுவாமிநாதன், மீனா என்பவரை மணந்தார். இந்த தம்பதிக்கு, குழந்தை மருத்துவர் சௌமியா சுவாமிநாதன், பொருளாதார நிபுணர் மதுரா சுவாமிநாதன் , பாலினம் மற்றும் கிராமப்புற மேம்பாடு நிபுணர் நித்யா சுவாமிநாதன் என 3 மகள்கள் உள்ளனர்.
தனது குடும்பத்திற்குச் சொந்தமான 2,000 ஏக்கர் நிலத்தில் மூன்றில் ஒரு பகுதியை, வினோபாபா பூமி தான இயக்கத்திற்கு நன்கொடையாக அளித்தவர் என்பது குறிப்பிடத்தக்கது.
