2032-ம் ஆண்டில் இந்திய விமானப்படை உலகிலேயே நம்பர் 1 ஆக இருக்கும் என்றும், போர் விமானங்களில் வெளிநாட்டு இறக்குமதியைக் குறைத்து உள்நாட்டு உற்பத்தியைப் பெருக்க வேண்டும் என்றும் விமானப்படைத் தளபதி வி.ஆர்.சௌத்ரி வலியுறுத்தி இருக்கிறார்.
இந்திய விமானப்படையின் 91-வது ஆண்டு விழா, உத்தரப் பிரதேச மாநிலம் பிரயாக்ராஜ் மாவட்டத்தில் உள்ள பாம்ராலி விமானப்படை நிலையத்தில் நடந்தது. இந்நிகழ்வில் உரையாற்றிய விமானப்படை தளபதி, “எங்களின் 91-வது ஆண்டு விழாவில் அனைத்து இந்திய விமானப்படை வீரர்களுக்கும் எனது வாழ்த்துகளை தெரிவித்துக் கொள்கிறேன் மேலும், பிரயாக்ராஜில் மிகச்சிறப்பாக இந்நிகழ்ச்சியை நடத்தியதற்காக, அணிவகுப்புத் தளபதிகள் மற்றும் அனைத்து விமானப் போர்வீரர்களையும் நான் பாராட்ட விரும்புகிறேன்.
இந்திய விமானப்படை மிகவும் சிறப்பாக செயல்பட்டு, ஒவ்வொரு சோதனையிலும் சிறப்பான வெற்றியை பெற்று வருவதை நான் மகிழ்ச்சியுடன் கவனிக்கிறேன். நாங்கள் சவால்களை முறியடித்தது மட்டுமல்லாமல், அந்த சவால்களை வாய்ப்புகளாக மாற்றி இருக்கிறோம். தற்போதைய புவிசார் அரசியல் நிலப்பரப்பு, உள்நாட்டுத் திறனை மேம்படுத்துவதன் மூலம் இறக்குமதியைச் சார்ந்திருப்பதைக் குறைக்கும் வாய்ப்பை எங்களுக்கு வழங்கி இருக்கிறது.
விமானப் படையின் செயல்பாடுகள் உலகம் முழுவதும் விரிவடைந்து, விரைவான இயக்கம் மற்றும் உலகளாவிய அணுகுமுறையை வழங்குகின்றன. விரைவான வரிசைப்படுத்தல், மனிதாபிமான உதவி மற்றும் பேரிடர் நிவாரணம், அமைதி காக்கும் பணிகள் போன்ற வடிவங்களில் எல்லைகளுக்கு அப்பால் வான் சக்தியை திட்டமிட, இந்த அணுகுமுறை அனுமதிக்கிறது. மேலும், வான்வழி சக்தியை மேம்படுத்துதல், அமைதியைப் பேணுவதற்கான வேகத்தை அமைத்தல் மற்றும் தேவைப்பட்டால் போர்களில் போராடி வெற்றி பெறுதல் போன்ற நுணுக்கங்களை நாம் புரிந்து கொள்ள வேண்டும்.
கடந்த 9 தசாப்தங்களாக, இந்திய விமானப்படை தொடர்ந்து பரிணாம வளர்ச்சியடைந்து, உலகின் மிகச்சிறந்த விமானப்படைகளில் ஒன்றாக மாறி இருக்கிரது. ஆனால், இது போதுமா? 2047-ம் ஆண்டுக்குள் இந்தியா ஒரு வளர்ந்த நாடாக மாறும் பாதையில் இருப்பதால், இந்திய விமானப்படை 2032-ல் 100 ஆண்டுகளை நிறைவு செய்யும் போது, உலகின் மிகச்சிறந்த விமானப்படைகளில் ஒன்றாக இருக்க வேண்டும். இந்த சிக்கலான மற்றும் ஆற்றல்மிக்க சூழலில், எங்கள் மூலோபாயத்தை செம்மைப்படுத்துதல், வலுவான ஆல்ரவுண்ட் திறன்களை உருவாக்குதல் மற்றும் எதிர்கால போர்களை நடத்துவதற்கான நெகிழ்வான மனநிலையை வளர்ப்பது தீர்க்கமானதாக இருக்கும். இந்திய விமானப்படை ஒரு இராணுவப் படை மட்டுமல்ல, அது நமது நாட்டின் கூட்டு வலிமை மற்றும் உறுதிப்பாட்டின் சின்னம்” என்றார்.
முன்னதாக, இந்திய விமானப்படைக்கு புதிய கொடியை விமானப்படைத் தளபதி வி.ஆர்.சௌத்ரி அறிமுகம் செய்தார். அக்கொடியில் இந்திய தேசிய மூவர்ணக் கொடியோடு, அசோகச் சக்கரமும், இறகுகளை விரித்த நிலையில் இமயமலைக் கழுகின் படமும் அச்சிடப்பட்டிருக்கிறது. இந்த புதிய கொடி ஆளில்லா குட்டி விமானங்கள் (ட்ரோன்கள்) மற்றும் விமானங்கள் மூலம் வானில் பறக்கவிடப்பட்டது.
இவ்விழாவில் விமான சாகசங்களும், பாராசூட் வீரர்களின் சாகச நிகழ்ச்சிகளும் இடம்பெற்றன. இந்நிகழ்ச்சியை விமானப்படை வீரர்களின் குடும்பத்தினர் உட்பட ஏராளமானோர் பார்த்து ரசித்தனர்.
