மாமல்லபுரம்: சர்வதேச மீன்வள மாநாடு தொடக்கம்!

மாமல்லபுரத்தில் இந்தோ – பசிபிக், மீன்வள மேலாண்மை குறித்த சர்வதேச மாநாட்டை மத்திய மீன்வளத்துறை அமைச்சர் திரு. பர்ஷோத்தம் ரூபாலா தொடங்கி வைத்தார்.

மாமல்லபுரத்தில் இந்திய மீன்வள அமைச்சகம் சார்பில், “பருவநிலை மாற்றத்தைச் சர்வதேச மீன்வள நடவடிக்கைகளில் முக்கியமானதாக்குதல் மற்றும் இந்தோ-பசிபிக் பிராந்தியத்தில் மீன்வள மேலாண்மை நடவடிக்கைகளை வலுப்படுத்துதல்” குறித்த 3 நாள் சர்வதேச மாநாடு நடைபெறுகிறது. மாநாட்டை மத்திய மீன்வளம், கால்நடை பராமரிப்பு மற்றும் பால்வளத்துறை அமைச்சர் பர்ஷோத்தம் ரூபாலா இன்று குத்துவிளக்கு ஏற்றி தொடங்கி வைத்தார். பின்னர் பருவநிலை மாற்றம் குறித்த 3 ஆய்வு மாநாட்டுப் புத்தகங்களை வெளியிட்டார்.

மீன் வளம் மற்றும் அதைச்சார்ந்த தொழில் முன்னேற்றம், புதுப்புது கண்டுபிடிப்புகள், பேரிடர் உள்ளடங்கிய பருவநிலை மாற்றங்கள் குறித்தும், இந்திய பசிபிக் பகுதியில் மீன்வள மேலாண்மையை வலுப்படுத்தவும் கருத்தரங்கில் பேசப்பட்டது.

ஜப்பான், ஆஸ்திரேலியா, இலங்கை, மாலத்தீவு, பங்களாதேஷ், சீனா, பிலிப்பைன்ஸ் உள்ளிட்ட பல்வேறு நாடுகளிலிருந்து, அந்நாட்டுப் பிரதிநிதிகள், கடல்வள ஆய்வாளர்கள், அத்துறையின் கல்வி பேராசிரியர்கள் என நூற்றுக்கும் மேற்பட்டோர் கலந்து கொண்டனர்.