கோவை மாநகரில் கூடுதல் கட்டணம் வசூல் மற்றும் சாலை வரி செலுத்தாமல் இயக்கப்பட்டு வந்த 18 ஆம்னி பேருந்துகளை மத்திய வட்டாரப் போக்குவரத்துக் கழக அதிகாரிகள் பறிமுதல் செய்தனர்.
ஆயுத பூஜை, சரஸ்வதி பூஜை உள்ளிட்ட தொடர் விடுமுறை காரணமாகச் சென்னையிலிருந்து, கோவை, திருச்சி, சேலம், பெங்களூரு மற்றும் தென் மாவட்டங்களுக்கு ஏராளமான பயணிகள் சென்று வருகின்றனர்.
இந்த நிலையில், விடுமுறையையொட்டி, தனியார் ஆம்னி பேருந்துகளில் கூடுதல் கட்டணம் வசூல் செய்யப்பட்டு வந்தது. இது குறித்து பொதுமக்கள் தொடர் புகார் அளித்தும் தமிழக போக்குவரத்துறை கண்டு கொள்ளவில்லை.
இந்த நிலையில், பொது மக்கள் புகார் எதிரொலியாக, மத்திய வட்டாரப் போக்குவரத்துக் கழக அதிகாரிகள் கடந்த மூன்று நாட்களாகக் கோவை மாநகரில் பல்வேறு பகுதிகளில் சோதனை மேற்கொண்டனர்.
இதில், கூடுதல் கட்டணம் வசூல் செய்தது மற்றும் சாலை வரி கட்டாமல் இயக்கப்பட்டது உள்ளிட்ட காரணங்களுக்காக 18 ஆம்னி பேருந்துகளை வட்டாரப் போக்குவரத்துத் துறை அதிகாரிகள் பறிமுதல் செய்து அபராதம் விதித்தனர்.
தற்போது பறிமுதல் செய்யப்பட்ட வாகனங்கள் கோவை மத்திய வட்டாரப் போக்குவரத்துக் கழக அலுவலகத்தில் நிறுத்தி வைக்கப்பட்டுள்ளது. இதேபோல் கூடுதல் கட்டணம் வசூல் செய்தால் சம்பந்தப்பட்ட தனியார் பேருந்துகளை உடனே பறிமுதல் செய்ய வேண்டும் என போக்குவரத்துறை அதிகாரிகளுக்கு பயணிகளும், பொது மக்களும் வேண்டுகோள் விடுத்துள்ளனர்.
