இஸ்ரேல் மற்றும் ஹமாஸ் இடையே 18-வது நாளாக போர் நீடித்து வரும் நிலையில், அக்டோபர் 26-ம் தேதி ஐ.நா. பொதுசபையின் அவசரக் கூட்டம் நடைபெறும் என்று அறிவிக்கப்பட்டிருக்கிறது.
ஐக்கிய நாடுகள் கூட்டமைப்பு என்பது உலகிலுள்ள 193 நாடுகளை உள்ளடக்கியது. இந்த கூட்டமைப்பில் 6 முக்கிய உறுப்பு அமைப்புகள் இருக்கின்றன. இந்த உறுப்பு அமைப்புகளில் மிகவும் முக்கியமானது ஐக்கிய நாடுகள் பொதுச்சபை. ஐ.நா. கூட்டமைப்பின் கொள்கை முடிவுகளை வகுக்கவும், உலக நாடுகளுக்கிடையே சச்சரவு எழும்போது ஐ.நா. சபையின் பிரதிநிதியாக செயல்பட்டு முக்கிய முடிவுகளை எடுக்கவும் இந்த பொதுசபை 1945-ல் உருவாக்கப்பட்டது.
இந்த பொதுசபையின் தலைமையகம், அமெரிக்காவின் நியூயார்க் நகரில் உள்ள ஐ.நா. சபை தலைமையகத்திலேயே இருக்கிறது. இங்கு இப்பொதுசபை உறுப்பினர் நாடுகளின் வருடாந்திர சந்திப்பு ஒவ்வொரு வருடமும் நடைபெறும். இது தவிர, உலக நாடுகளுக்கிடையே ஏதேனும் பிரச்சனைகள் மற்றும் சிக்கல்களால் நெருக்கடி நிலை ஏற்படும்போது, அவசியம் ஏற்பட்டால் அவசர சந்திப்புகளுக்கு உறுப்பினர் நாடுகளுக்கு அழைப்பு விடுத்து பொதுசபை கூடுவதுண்டு.
அந்த வகையில், கடந்த 2022-ம் ஆண்டு பிப்ரவரி மாதம் உக்ரைன் மீது ரஷ்யா போர் தொடுத்ததைத் தொடர்ந்து அவசரக் கூட்டம் நடைபெற்றது. இந்த சூழலில், கடந்த அக்டோபர் 7-ம் தேதியில் இருந்து பாலஸ்தீனத்தின் ஹமாஸ் அமைப்பினருக்கும் இஸ்ரேல் நாட்டுக்கும் போர் நடந்து வருகிறது. இதையடுத்து, ஐக்கிய நாடுகள் பொதுசபையின் 10-வது அவசர சந்திப்பு அக்டோபர் 26-ம் தேதி நடைபெறும் என்று, அதன் தலைவர் டென்னிஸ் பிரான்சிஸ் அறிவித்திருக்கிறார்.
இதுகுறித்து டென்னிஸ் தனது அதிகாரப்பூர்வ எக்ஸ் பக்கத்தில் வெளியிட்டிருக்கும் பதிவில், “ஐக்கிய நாடுகள் சபையில் உறுப்பினராக இருக்கும் நாடுகள் அவசர சந்திப்பிற்கு ஐ.நா. பொதுசபையைக் கூட்டும்படி கோரிக்கை வைத்தன. இக்கோரிக்கையை ஏற்று 10-வது அவசர கூட்டம் வரும் 26-ம் தேதி நடத்தப்படும்” என்று தெரிவித்திருக்கிறார். 24 மணி நேரத்திலேயே அவசரக் கூட்டத்திற்கு அழைப்பு விடுக்க ஐ.நா. பொதுசபைக்கு அதிகாரம் உள்ளது என்பது குறிப்பிடத்தக்கது.
