திருச்சி விமான நிலையத்தில், ரூபாய் 1 கோடியே 85 இலட்சம் மதிப்பிலான, 3 கிலோ கடத்தல் தங்கத்தை சுங்கத்துறை அதிகாரிகள் பறிமுதல் செய்தனர்.
திருச்சி விமான நிலையத்திலிருந்து மலேசியா, சிங்கப்பூர், துபாய், இலங்கை உள்ளிட்ட பல்வேறு நாடுகளுக்கு விமானங்கள் இயக்கப்பட்டு வருகின்றன.
திருச்சி விமான நிலையத்திற்கு வெளிநாடுகளிலிருந்து வரும் பயணிகள் தங்கள் உடைமைகள் மற்றும் உடைகளில் மறைத்து வைத்து தங்கம் உட்பட பல பொருட்களைக் கடத்தி வருவது வாடிக்கையாகி விட்டது.
இந்த நிலையில், மலேசியாவிலிருந்து திருச்சி விமான நிலையத்திற்கு, ஏர் ஏசியா விமானம் வந்தது. இந்த விமானத்தில் வந்த பயணிகளை மத்திய வான் நுண்ணறிவு பிரிவு அதிகாரிகள் சோதனை செய்தனர்.
அப்போது, சந்தேகத்திற்கு இடமாக நடந்து கொண்ட, பயணிகள் மூன்று பேரை, சுங்கத்துறை அதிகாரிகள் தனித்தனியாக அழைத்துச் சென்று விசாரணை மேற்கொண்டனர். அப்போது, அவர்கள் மலேசியாவைச் சேர்ந்தவர்கள் என்பது தெரியவந்தது.
பின்னர், அவர்களைச் சோதனை செய்தபோது, அந்த 3 பயணிகளும் உடலில் மறைத்து, பசை வடிவிலான தங்கத்தைக் கடத்தி வந்திருப்பது தெரிய வந்தது.
ரூபாய் 1 கோடியே 85 இலட்சம் மதிப்பிலான 3.01 கிலோ கடத்தல் தங்கத்தை அவர்களிடம் இருந்து சுங்கத்துறை அதிகாரிகள் பறிமுதல் செய்தனர்.
இதைத்தொடர்ந்து, தங்கத்தைக் கடத்தி வந்த 3 பேரையும் அதிகாரிகள் கைது செய்து விசாரணை மேற்கொண்டு வருகின்றனர்.
