ஆவின் நிறுவனத்தில் தொடரும் முறைகேடு : அண்ணாமலை

ஆவின் பால் நிறுவனத்தில் பல்வேறு முறைகேடுகள் நடைபெற்று வருவதாக தமிழக பாஜக மாநில தலைவர் அண்ணாமலை குற்றம்சாட்டியுள்ளார்.

மதுரையில் தமிழக பாஜக மாநில தலைவர் அண்ணாமலை செய்தியாளர்களிடம் பேசினார். அப்போது, நாடு முழுவதும் அமுல் நிறுவனம் சிறப்பாக செயல்பட்டு வருவதாகவும், . அந்த நிறுவனத்தின் 65 சதவீத லாபம் பால் உற்பத்தியாளர்களுக்கு வழங்கப்பட்டு வருவதாகவும் கூறினார்.

ஆனால் ஆவின் பால் நிறுவனத்தில் பல்வேறு முறைகேடுகள் நடைபெற்று வருவதாக அவர் சாடினார். ஆவின் பாலில் கொழுப்பு சத்துக்களை குறைக்கப்பட்டுள்ளதாகவும், இதனால் ரூ.8 முதல் ரூ.10 வரை மக்களிடம் இருந்து ஆவின் நிர்வாகம் கொள்ளையடிப்பதாகவும் அவர் கூறினார்.

ஆவின் பாலில் கொழுப்பு சத்து குறைக்கவில்லை என அமைச்சர் மனோ தங்கராஜ் பொய் பேசி வருவதாகவும், தனியார் பால் நிறுவனங்களை ஊக்குவிக்கும் வகையில் ஆவின் நிறுவனம் செயல்பட்டு வருவதாகவும் அண்ணாமலை தெரிவித்தார்.

ஆவினில் 1 சதவீதம் கொழுப்பு குறைத்தால் ரூ.8 வரை லாபம் கிடைக்கும் என்றும், ஆனால் தற்போது 1.3 சதவீதம் வரை கொழுப்பு குறைக்கப்பட்டுள்ளது. இதில் கிடைக்கும் லாபம் கொள்ளையடிக்கப்படுவதாகவும் அவர் கூறினார்.

தமிழகத்தில் அரசு நிதி இல்லாமல் ஒவ்வொரு கோவில்களிலும் கிடைக்கும் பக்தர்களின் பணத்தை வைத்து கும்பாபிஷேகம் நடத்தப்பட்டு வருவதாகவும், இதற்கு தி.மு.க. அரசு எந்த பங்களிப்பும் செய்யவில்லை என்றும் அண்ணாமலை குற்றம்சாட்டினார்.

கோவில்களில் திருடு போன சிலைகளை மீட்க தி.மு.க. நடவடிக்கை எடுக்கவில்லை என்றும், அண்ணாமலை கூறினார்.