இலாகா இல்லாத திமுக அமைச்சர் செந்தில் பாலாஜிக்கு மருத்துவ காரணங்களுக்காக ஜாமீன் வழங்க முடியாது என உச்ச நீதிமன்றம் தெரிவித்துள்ளது.
சட்ட விரோத பணப்பரிமாற்ற வழக்கில் கடந்த ஜூன் 14 -ம் தேதி, அமைச்சர் செந்தில் பாலாஜி, அமலாக்கத்துறையினரால் கைது செய்யப்பட்டார்.
இதனைத் தொடர்ந்து, தனியார் மருத்துவமனையில் இருதய அறுவை சிகிச்சை செய்து கொண்ட நிலையில், அவர் சென்னை புழல் சிறையில் அடைக்கப்பட்டார்.
இதனிடையே, செந்தில் பாலாஜியின் நீதிமன்ற காவலை சென்னை முதன்மை அமர்வு நீதிமன்றம் தள்ளுபடி செய்தது. இதனைத்தொடர்ந்து, ஜாமீன் வழங்கக் கோரி செந்தில் பாலாஜி தரப்புச் சென்னை உயர் நீதிமன்றத்தை நாடினர்.
ஆனால், சாட்சிகளைக் கலைத்து விடுவார் என்பதால், செந்தில் பாலாஜிக்கு ஜாமீன் வழங்க முடியாது எனச் சென்னை உயர் நீதிமன்றம் மறுத்துவிட்டது.
இதனால், ஜாமீன் வழங்கக் கோரி உச்ச நீதிமன்றத்தில் அமைச்சர் செந்தில் பாலாஜி தரப்பில் மனு தாக்கல் செய்யப்பட்டது. தற்போது, உடல் நலக்குறைவு காரணமாகச் சென்னை ஓமந்தூரார் அரசு மருத்துவமனையில் அமைச்சர் செந்தில் பாலாஜி சிகிச்சை பெற்று வருகிறார்.
இந்த நிலையில், அமைச்சர் செந்தில் பாலாஜி மீதான ஜாமீன் வழக்கு உச்ச நீதிமன்றத்தில் இன்று விசாரணைக்கு வந்தது. அப்போது, அமைச்சர் செந்தில் பாலாஜிக்கு மருத்துவக் காரணங்களுக்கு ஜாமீன் வழங்க உச்ச நீதிமன்றம் மறுத்துவிட்டது.
இதனால், மருத்துவ ஜாமீன் மனுவை திரும்பப் பெறுவதாகவும், வழக்கமான ஜாமீன் மனு தாக்கல் செய்யப்படும் என்றும் செந்தில் பாலாஜி தரப்பு நீதிமன்றத்தில் தெரிவித்துள்ளது.
