சென்னை மாநகராட்சிக்கு சொந்தமான 358 பள்ளிகளில் செயல்படுத்தப்பட்டு வரும் காலை உணவுத் திட்டத்தை தனியாரிடம் ஒப்படைக்க மாநகராட்சிக் கூட்டத்தில் 29-ம் தேதி மேயர் பிரியா தலைமையில் நடைபெற்ற கூட்டத்தில் தீர்மானம் நிறைவேற்றப்பட்டுள்ளது.
பெருநர சென்னை மாநகராட்சியின் 358 பள்ளிகளில் பயிலும் 65,000 மாணவர்களுக்கு இந்தத் திட்டத்தை மாநகராட்சி மூலமாக செயல்படுத்தி வருகிறது. இதுவரை அரசே செயல்படுத்தி வந்த நிலையில், இந்தத் திட்டத்தை தனியாரிடம் வழங்கி அதற்கு ரூ.19 கோடியை தாரைவார்க்க உள்ளது.
இதனால், தமிழ்நாடு முழுவதும் காலை உணவுத் திட்டத்தை தனியாரிடம் ஒப்படைக்க முடிவு செய்து, அதற்கான சோதனை முயற்சியாக சென்னையில் இப்படி செய்யப்பட்டு உள்ளதோ? என்ற ஐயம் எழுந்துள்ளதாக சமூக ஆர்வலர்கள் குற்றம் சாட்டியுள்ளனர்.
மேலும், கடந்த ஆட்சியிலேயே காலை உணவுத் திட்டம் தொடங்கப்பட்டது. அட்சய பாத்திரம் என்ற தனியார் தொண்டு நிறுவனம் மூலம் செயல்படுத்தப்பட்டது. இந்த திட்டத்திற்கு மாநகராட்சியோ, அரசோ அந்த நிறுவனத்திற்கு நேரடியாக நிதி வழங்காத நிலையில், தமிழக ஆளுநர் மாளிகை மூலமாக ரூ.5 கோடி வழங்கப்பட்டது.
அதற்கு கடும் எதிர்ப்பு எழுந்ததால், காலை உணவுத் திட்டத்தை தமிழக அரசே நடத்தும் என்று முதல்வர் ஸ்டாலின் அறிவித்தார். ஆனால், இப்போது அதே திட்டத்தை ரூ.19 கோடியை தனியாருக்கு கொடுத்து செயல்படுத்தச் சொல்வதன் நோக்கம் என்ன? என பல்வேறு அரசியல் கட்சி தலைவர்கள் கேள்வி எழுப்பியுள்ளனர்.
