பொதுத்தேர்வு எழுதும் மாணவர்களின் கவனத்திற்கு – சி.பி.எஸ்.இ., முக்கிய அறிவிப்பு!

பத்து மற்றும் பன்னிரண்டாம் வகுப்பு பொதுத்தேர்வில் மாணவர்களுக்குத் தரவரிசை மற்றும் சிறப்பிடம் போன்றவை வழங்கப்படாது என்று சி.பி.எஸ்.இ. அறிவித்துள்ளது.

பல்வேறு மாநில பாடத்திட்ட பள்ளிகளில், 10-ஆம் வகுப்பு, பன்னிரண்டாம் வகுப்பு பொதுத்தேர்வு மாணவர்களுக்கான மதிப்பெண்ணில், அதிக மதிப்பெண் எடுப்பவர்களுக்கு, முதலிடம், இரண்டாம் இடம், முதல் கிரேடு, இரண்டாம் கிரேடு என்று சிறப்பிடங்கள் வழங்கப்படுகின்றன. இதனால், மாணவர்களுக்கு மன அழுத்தம் ஏற்படுவதாகக் கூறப்படுகிறது. இதனை அடுத்து, சி.பி.எஸ்.இ., முக்கிய முடிவை எடுத்துள்ளது.

இதுகுறித்து, தேர்வு கட்டுப்பாட்டு அதிகாரி சன்யம் பரத்வாஜ் நேற்று வெளியிட்ட அறிவிப்பில் கூறியிருப்பதாவது: சி.பி.எஸ்.இ., நடத்தும் பொதுத்தேர்வுகளில், மாணவர்களின் சராசரி மதிப்பெண்கள், அவர்களின் மதிப்பெண்ணைக் கணக்கிடும் முறை போன்றவற்றைத் தெரிவிக்குமாறு, பல்வேறு அமைப்புகள் தரப்பில் கேட்கப்பட்டுள்ளன. சி.பி.எஸ்.இ.-யைப் பொறுத்தவரை, மாணவர்களின் மதிப்பெண் அடிப்படையில், மண்டல அளவிலோ, ஒட்டு மொத்தமாகவோ கணக்கிட்டு, சிறப்பிடங்கள் வழங்கப்படுவதில்லை.

உயர்கல்வி அல்லது வேலைவாய்ப்பு வழங்கும் நிறுவனங்கள், ஒரு மாணவர், ஐந்து பாடங்களுக்கு மேல் தேர்வு எழுதியுள்ள நிலையில், ஏதாவது ஐந்து பாடங்களில் மட்டும் தேர்ச்சி பெற்ற மதிப்பெண்களைக் கணக்கிட்டு கொள்ளலாம்.

சி.பி.எஸ்.இ. நிர்வாகம் சார்பில், மாணவர்களின் மதிப்பெண்களைக் கணக்கிட்டு, சராசரி மதிப்பெண் குறிப்பிடுவது கிடையாது. உயர்கல்வி சேர்க்கையோ அல்லது வேலைவாய்ப்பு வழங்கலோ எதுவானாலும், சம்பந்தப்பட்ட நிறுவனங்கள் முடிவெடுத்துக் கொள்ள வேண்டும் என்று கூறப்பட்டுள்ளது.