உலகளவில் சக்திவாய்ந்த பெண்கள் பட்டியலில் நிர்மலா சீதாராமன்!

உலகளவில் சக்திவாய்ந்த பெண்கள் பட்டியலில் நிதியமைச்சர் நிர்மலா சீதாராமன் உட்பட 4 இந்தியர்களின் பெயர்கள் இடம்பெற்றிருக்கின்றன.

அமெரிக்காவின் போர்ப்ஸ் பத்திரிகை, உலகளவில் மிகவும் சக்தி வாய்ந்த 100 பெண்கள் அடங்கிய பட்டியலை ஆண்டுதோறும் வெளியிட்டு வருகிறது. இப்பட்டியல் செல்வம், ஊடகம், தாக்கம் மற்றும் செல்வாக்கு ஆகிய 4 துறைகளின் அடிப்படையில் தயாரிக்கப்படுகிறது.

அந்த வகையில், இந்த ஆண்டுக்கான பட்டியல் தற்போது வெளியிடப்பட்டிருக்கிறது. இப்பட்டியலில் ஐரோப்பிய கமிஷன் தலைவர் ஊர்சுலா வாண்டர் லியன் முதலிடத்தை பிடித்திருக்கிறார். ஐரோப்பிய மத்திய வங்கித் தலைவர் கிறிஸ்டின் லகார்ட் 2-வது இடத்தையும், அமெரிக்க துணை அதிபர் கமலா ஹாரிஸ் 3-வது இடத்தையும் பிடித்திருக்கிறார்கள்.

இப்பட்டியலில் மத்திய நிதியமைச்சர் நிர்மலா சீதாராமன் 32-வது இடத்தைப் பிடித்திருக்கிறார்கள். கடந்த 4 ஆண்டுகளாக இப் பட்டியலில் இடம்பிடித்து வரும் நிர்மலா சீதாராமன், 5-வது முறையாக இந்த ஆண்டும் தனது இடத்தை உறுதி செய்திருக்கிறார்.

அதேபோல, இந்தியாவின் ஹெச்.சி.எல். டெக் தலைவர் ரோஷினி நாடார் மல்கோத்ரா 60-வது இடத்தையும், இந்திய ஸ்டீல் ஆணையத் தலைவர் சோமா மண்டல் 70-வது இடத்தையும், பயோகான் நிறுவனத் தலைவர் கிரண் மஜூம்தார் ஷா 76-வது இடத்தையும் பிடித்திருக்கிறார்கள்.

கடந்த ஆண்டு இப்பட்டியலில் ரோஷினி நாடார் மல்கோத்ரா, சோமா மண்டல், கிரண் மஜூம்தார் ஷா ஆகியோரும் இடம் பெற்றிருந்தது குறிப்பிடத்தக்கது.