ராஜஸ்தான் மாநில முதல்வர் யார் என்பதில் தாமதம் ஏற்பட்டு வந்த நிலையில், பஜன்லால் ஷர்மா பா.ஜ.க. முதல்வராக தேர்வு செய்யப்பட்டிருக்கிறார்.
ராஜஸ்தான் உட்பட 5 மாநிலங்களுக்கு கடந்த நவம்பர் மாதம் தேர்தல் நடந்தது. இதன் முடிவுகள் டிசம்பர் 3-ம் தேதி வெளியாகின. இதில், ராஜஸ்தான், மத்தியப் பிரதேசம், சத்தீஸ்கர் ஆகிய 3 மாநிலங்களில் பா.ஜ.க. தனிப்பெரும்பான்மையுடன் வெற்றிபெற்றது.
இதையடுத்து, பா.ஜ.க. சார்பில் 3 மாநிலங்களுக்குமான முதல்வர்களை தேர்வு செய்யும் பணிகள் நடந்து வந்தன. இதற்காக, 3 மாநிலங்களுக்குமான மத்தியப் பார்வையாளர்கள் பா.ஜ.க. தலைமையால் நியமிக்கப்பட்டார்கள். இவர்கள், தங்களுக்கு ஒதுக்கப்பட்ட மாநிலங்களுக்குச் சென்று பா.ஜ.க. எம்.எல்.ஏ.க்கள் கூட்டத்தைக் கூட்டி முதல்வரை தேர்வு செய்தார்கள்.
அந்த வகையில், கடந்த 10-ம் தேதி அர்ஜூன் முண்டா தலைமையிலான மத்தியப் பார்வையாளர்கள் குழு சத்தீஸ்கர் மாநிலத்துக்குச் சென்று, பா.ஜ.க. எம்.எல்.ஏ.க்கள் கூட்டத்தைக் கூட்டி, விஷ்ணு தியோ சாயை அம்மாநில முதல்வராகத் தேர்வு செய்தது.
தொடர்ந்து, ஹரியானா முதல்வர் மனோகர் லால் கட்டார் தலைமையிலான மத்தியப் பார்வையாளர்கள் குழு, மத்தியப் பிரதேச மாநிலத்துக்குச் சென்று, பா.ஜ.க. எம்.எல்.ஏ.க்கள் கூட்டத்தைக் கூட்டி, மோகன் யாதவை அம்மாநில முதல்வராகத் தேர்வு செய்தது.
இந்த நிலையில், ராஜஸ்தான் மாநில முதல்வரை தேர்வு செய்வதற்காக மத்திய பாதுகாப்புத் துறை அமைச்சர் ராஜ்நாத் சிங் தலைமையிலான மத்தியப் பார்வையாளர்கள் குழு சென்றது. தொடர்ந்து, பா.ஜ.க. எம்.எல்.ஏ.க்கள் கூட்டத்தைக் கூட்டி விவாதிக்கப்பட்டது. அப்போது, புதிய முதல்வராக பஜன் லால் ஷர்மா ஏகமனதாகத் தேர்ந்தெடுக்கப்பட்டிருக்கிறார்.
