டெல்லியில் கடும் குளிர் நீடிப்பதால் பள்ளிகளுக்கு விடுமுறை அறிவிக்கப்பட்ட நிலையில், அந்த அறிவிப்பை டெல்லி அரசு திரும்பப் பெற்றுள்ளது.
கடந்த சில வாரங்களாக வட மாநிலங்களில் அதிக அளவிலான பனிமூட்டம் காணப்படுகிறது. குறிப்பாக தலைநகர் டெல்லியில் கடும் பனிப்பொழிவு நிலவி வருகிறது. அதிகாலை மற்றும் இரவு நேரங்களில் குளிரின் தாக்கம் அதிகமாக உள்ளது. இதனால், பொது மக்களின் இயல்பு வாழ்க்கை கடுமையாக பாதிக்கப்பட்டுள்ளது.
குளிரின் தாக்கம் அதிகமாக உள்ளதால், வாகனங்களை இயக்குவதில் சிரமம் ஏற்பட்டுள்ளது. மேலும், சாலைகள் முழுவதும் பனிமூட்டம் சூழ்ந்துள்ளதால், வாகனங்கள் பகல் நேரங்களிலும், விளக்கை ஒளிரவிட்டபடி செல்கின்றன.
இதற்கிடையே, தலைநகர் டெல்லியில் குளிர்கால விடுமுறை முடிந்து, திங்கட்கிழமை பள்ளிகளைத் திறக்க திட்டமிடப்பட்டு இருந்த நிலையில், கடுமையான குளிர் காரணமாக, வரும் 10-ஆம் தேதி வரை குளிர்கால விடுமுறை நீட்டிக்கப்படுவதாக அறிவிப்பு வந்தது.
இந்நிலையில், அறிவிப்பு தவறுதலாக வந்ததாக கூறி, டெல்லி அரசு அதனை திரும்பப் பெற்றுள்ளது. குளிர்கால விடுமுறை நீட்டிப்பது குறித்து இன்று முடிவெடுக்கப்படும் என்று என்றும் கூறப்பட்டுள்ளது.
