இராமருக்கு தங்கக் காலணிகள்: அயோத்திக்கு பக்தர் நடைப்பயணம்!

அயோத்தி இராமஜென்ம பூமியில் கட்டப்பட்டு வரும் இராமர் கோவிலில் பிரதிஷ்டை செய்யப்படவிருக்கும் இராம் லல்லா சிலைக்கு, காணிக்கையாக வழங்கவிருக்கும் தங்க காலணிகளை சுமந்தபடி, ஐதராபாத் பக்தர் நடைப்பயணம் செல்கிறார்.

அயோத்தியிலுள்ள இராமஜென்ம பூமியில், 1,800 கோடி ரூபாயில் ஸ்ரீராமர் கோவில் கட்டப்பட்டு வருகிறது. இக்கோவில் கும்பாபிஷேகம் வரும் 22-ம் தேதி நடைபெறவிருக்கிறது. விழாவை முன்னிட்டு, அயோத்தி நகரம் மட்டுமல்ல நாட்டின் பல்வேறு பகுதிகளும் விழாக்கோலம் பூண்டு வருகிறது.

மேலும், அயோத்தி இராமர் கோவிலுக்கு பக்தர்கள் பலரும் காணிக்கையாக பல்வேறு பொருட்களை வழங்கி வருகின்றனர். அந்த வகையில், ஐதராபாத்தைச் சேர்ந்த இராம பக்தர் ஒருவர், அயோத்தி ஸ்ரீராமருக்காக தங்க முலாம் பூசப்பட்ட காலணிகளை காணிக்கையாக வழங்கவிருக்கிறார். இதை அயோத்தி கோவிலில் ஒப்படைப்பதற்கு பாதயாத்திரையாக அயோத்திக்கு செல்கிறார்.

தெலங்கானா மாநிலம் ஐதராபாத்தைச் சேர்ந்தவர் சல்லா சீனிவாச சாஸ்திரி. தீவிர இராம பக்தரான இவர், அயோத்தியில் உள்ள ஸ்ரீராமருக்காக 65 லட்சம் ரூபாய் மதிப்பில், ஐம்பொன்னால் செய்யப்பட்டு, தங்க முலாம் பூசப்பட்ட காலணிகளை காணிக்கையாக வழங்க முடிவு செய்தார்.

மேலும், அக்காலணிகளை தனது தலையில் சுமந்தபடி, ராமேஸ்வரத்தில் இருந்து அயோத்திக்கு சுமார் 8,000 கி.மீ. தூரத்துக்கு புனித நடைப்பயணமாக சென்று வழங்கத் திட்டமிட்டார். அதன்படி, கடந்த ஆண்டு ஜூலை மாதம் 20-ம் தேதி, காலணிகளை தலையில் சுமந்தபடி ராமேஸ்வரத்தில் இருந்து தனது நடைப்பயணத்தைத் தொடங்கினார்.

இதனிடையே, தீடீரென லண்டன் செல்ல வேண்டி இருந்ததால், சீனிவாச சாஸ்திரி, தனது நடைப்பயணத்தை சில நாட்கள் ஒத்திவைத்தார். பின்னர், மீண்டும் தனது பயணத்தைத் தொடர்ந்தவர், தற்போது உத்தரப் பிரதேச மாநிலத்தில் உள்ள சித்ரகூடம் என்னும் இடத்தில் தனது நண்பர்களுடன் தங்கி இருக்கிறார்.

இந்த இடத்தில் இருந்து அயோத்தி நகரம் சுமார் 272 கி.மீ. தொலைவில் உள்ளது. ஆகவே, இன்னும் 10 நாட்களில் அவர் அயோத்திக்குச் செல்ல வேண்டும் என்பதால், தினமும் 30 கி.மீ. நடக்க திட்டமிட்டிருப்பதாகத் தெரிவித்திருக்கிறார்.

இதுகுறித்து சீனிவாச சாஸ்திரி கூறுகையில், “ஆஞ்சநேயரின் தீவிர பக்தரான எனது தந்தை அயோத்தியில் நடந்த கர சேவையில் கலந்து கொண்டார். அயோத்தியில் இராமர் கோவில் கட்ட வேண்டும் என்பது அவரது விருப்பம். தற்போது எனது தந்தை இல்லை.

எனினும், எனது தந்தையின் ஆசையை நிறைவேற்றும் வகையில், பகவான் ஸ்ரீராமருக்காக தங்க முலாம் பூசப்பட்ட காலணிகளை தலையில் சுமந்தபடி புனிதப் பயணமாக வந்திருக்கிறேன். இன்னும் சில தினங்களில் அயோத்தியை சென்றடைவேன். அங்கு இந்த புனித காலணிகளை முதல்வர் யோகி ஆதித்யநாத்திடம் வழங்குவேன்.

இராமர் கோவில் கட்டுவதற்காக ஏற்கெனவே 5 வெள்ளி செங்கல்களை வழங்கி இருக்கிறேன். தற்போது சிலரின் நன்கொடை உதவியுடன் இந்த புனித காலணிகளை செய்திருக்கிறேன். எனது மகன் சல்லா பவன் குமார், ஒரு சவுண்டு இன்ஜினீயர். அவர் பல திரைப்பட ஸ்டூடியோக்களில் பணிபுரிந்திருக்கிறார்” என்றார்.