பஞ்சாப்பில் நிலவி வரும கடும் குளிரின் காரணமாக, மாணவர்களின் நலனை கருத்தில் கொண்டு, வரும் 12-ஆம் தேதி வரை பள்ளிகளுக்கு விடுமுறை அறிவிக்கப்பட்டுள்ளது.
கடந்த சில வாரங்களாக வட மாநிலங்களில் அதிக அளவிலான பனிமூட்டம் காணப்படுகிறது. குறிப்பாக டெல்லி, பஞ்சாப் உள்ளிட்ட மாநிலங்களில் கடும் குளிர் மற்றும் பனிப்பொழிவு நிலவி வருகிறது.
அதிகாலை மற்றும் இரவு நேரங்களில் குளிரின் தாக்கம் அதிகமாக உள்ளது. இதனால், பொது மக்களின் இயல்பு வாழ்க்கை கடுமையாக பாதிக்கப்பட்டுள்ளது. உடலை வாட்டி வதைக்கும் கடும் குளிரில் இருந்து மக்கள் தங்களைக் காத்துக் கொள்ள சாலையோரங்களில் தீ மூட்டி குளிர் காய்கின்றனர்.
குளிரின் தாக்கம் அதிகமாக உள்ளதால், வாகனங்கள் இயக்குவதில் சிரமம் ஏற்பட்டுள்ளது. மேலும், சாலைகள் முழுவதும் பனிமூட்டம் சூழ்ந்துள்ளதால், வாகனங்கள் பகல் நேரங்களிலும், முகப்பு விளக்கை ஒளிரவிட்டபடி செல்கின்றன.
இந்நிலையில் பஞ்சாப்பில் நிலவி வரும் கடும் குளிர் காரணமாக, அந்த மாநிலத்தில் உள்ள அனைத்து அரசு, அரசு உதவிப்பெறும் மற்றும் தனியார் பள்ளிகளில், 10-ஆம் வகுப்பு வரை பயிலும் மாணவர்களுக்கு, வரும் 8-ஆம் தேதி முதல் 14-ஆம் தேதி வரை விடுமுறை அறிவித்து முதல்வர் பகவந்த் மான் உத்தரவு பிறப்பித்துள்ளார்.
இதற்கிடையே, தலைநகர் டெல்லியில் குளிர்கால விடுமுறை முடிந்து, இன்று பள்ளிகள் திறக்க இருந்த நிலையில், கடுமையான குளிரின் காரணமாக, 5-ஆம் வகுப்பு வரையிலான மாணவர்களுக்கு வருகிற 12-ஆம் தேதி வரை பள்ளிகளுக்கு விடுமுறை அறிவிக்கப்பட்டுள்ளது.
