பாகிஸ்தான் ஆக்கிரமிப்பு காஷ்மீருக்கு அந்நாட்டுக்கான பிரிட்டன் தூதர் சென்றதற்கு, மத்திய வெளியுறவுத்துறை அமைச்சகம் கடும் எதிர்ப்புத் தெரிவித்திருக்கிறது.
பாகிஸ்தானுக்கான பிரிட்டன் தூதராக இருப்பவர் ஜேன் மேரியட். இவர், சமீபத்தில் பாகிஸ்தான் ஆக்கிரமிப்பு காஷ்மீரில் உள்ள மிர்புர் பகுதிக்குச் சென்றார். மேலும், இது குறித்த புகைப்படங்கள் மற்றும் வீடியோக்களையும் தனது சமூக வலைதளங்களில் வெளியிட்டார்.
இந்த நிலையில், ஆக்கிரமிப்பு காஷ்மீருக்கு பிரிட்டர் தூதர் சென்றதற்கு மத்திய வெளியுறவுத்துறை அமைச்சகம் கடும் எதிர்ப்புத் தெரிவித்திருக்கிறது. இதுகுறித்து வெளியுறவுத்துறை அமைச்சகம் அறிக்கை ஒன்றையும் வெளியிட்டிருக்கிறது.
அந்த அறிக்கையில், “பாகிஸ்தானுக்கான பிரிட்டன் தூதர், தனது நாட்டு அதிகாரிகளுடன் கடந்த 10-ம் தேதி ஆக்கிரமிப்பு காஷ்மீருக்கு சென்றது ஆட்சேபனைக்குரியது. இதை இந்தியா கவனத்தில் எடுத்துக் கொண்டிருக்கிறது.
இந்த அத்துமீறல் குறித்து டெல்லியில் உள்ள பிரிட்டன் தூதரிடம் கடுமையான எதிர்ப்பை வெளியுறவுத்துறை செயலாளர் பதிவு செய்திருக்கிறார். யூனியன் பிரதேசமான ஜம்மு காஷ்மீர் மற்றும் லடாக் ஆகியவை இந்தியாவின் ஒருங்கிணைந்த பகுதியாக உள்ளது. இது எப்போதும் நீடிக்கும்” என்று கூறப்பட்டிருக்கிறது.
