அயோத்தி ராமர் கோவில் கும்பாபிஷேகத்தை முன்னிட்டு கேரளாவின் திருவனந்தபுரத்தில் பத்மநாபசுவாமி கோயில் பாரம்பரியம் மிக்க ஓணவில் ஒன்றை ராமர் கோவிலுக்கு பரிசாக வழங்கவுள்ளது.
உத்தரப் பிரதேச மாநிலம் அயோத்தி ராமர் கோவில் கும்பாபிஷேக விழா ஜனவரி 22 ஆம் தேதி நடைபெறுகிறது. இதற்கான ஏற்பாடுகளை ஸ்ரீராம் ஜென்மபூமி அறக்கட்டளை செய்து வருகிறது.
ராமர் கோவில் கும்பாபிஷேகத்திற்காக கேரளாவின் திருவனந்தபுரத்தில் உள்ள உலகப் புகழ்பெற்ற பத்மநாபசுவாமி கோயில் அயோத்தியில் ராமர் கோயிலுக்கு பாரம்பரியம் மிக்க ஓணவில் ஒன்றை பரிசாக வழங்கவுள்ளது.
இந்த பத்மநாபசுவாமி கோவில் இதிகாசங்கள் மற்றும் புராணங்களில் இடம்பெற்றுள்ளது. பலராமர் இந்தக் கோயிலுக்குச் சென்று, பத்மதீர்த்தத்தில் நீராடி, பல பிரசாதங்களைச் செய்ததாக ஸ்ரீமத் பாகவதம் கூறுகிறது.
9ஆம் நூற்றாண்டின் கவிஞரும், 12 வைணவ ஆழ்வார்களின் ஒருவருமான நம்மாழ்வார் பத்மநாபரைப் புகழ்ந்து பத்து பாடல்களை இயற்றியுள்ளார்.
பத்மநாபசுவாமி கோயிலின் கிழக்கு வாசலில் இன்று நடைபெறும் நிகழ்ச்சியில், கோயில் தந்திரி மற்றும் கோயில் நிர்வாகக் குழு உறுப்பினர்கள் அயோத்தி ராமர் கோயில் அறக்கட்டளையின் பிரதிநிதிகளிடம் ஓணவில்லை வழங்குவார்கள் என்று ஸ்ரீ பத்மநாபசுவாமி கோயிலின் செயல் அலுவலர் தெரிவித்துள்ளார்.
ஓணவில் வழங்குவது ஸ்ரீ பத்மநாப சுவாமி கோயிலில் செய்யப்பட்டு வரும் மூன்னூறு ஆண்டுகள் பழமையான சம்பிரதாயம் ஆகும்.
ஒவ்வொரு ஆண்டும் ஓணம் பண்டைகையை முன்னிட்டு, ஒரு பாரம்பரிய குடும்பத்தைச் சேர்ந்தவர்கள் பத்மநாப கோவிலில் ஓணவில் காணிக்கை செலுத்துகிறார்கள்.
பத்மநாப சுவாமி கோயில் சார்பில் அயோத்தி ராமர் கோயிலுக்கு வழங்கப்படும் ஓணவில் கொச்சியில் இருந்து விமானம் மூலம் அயோத்திக்குக் கொண்டு செல்லப்படும்.
முன்னதாக, சன்னதி வளாகத்தில் வைக்கப்படும் ஓணவில்லை இன்று பக்தர்கள் தரிசனம் செய்யலாம் என்று கோயில் நிர்வாகிகள் கூறுகின்றனர்.
இந்த ஓணவில் மரத்தாலான பலகையில் இருபுறமும் ஓவியங்களைக் கொண்டிருக்கும். அனந்தசயனத்திலும் தசாவதாரம், ஸ்ரீராம பட்டாபிஷேகம் போன்ற பல்வேறு விஷயங்கள் ஓவியங்களில் சித்தரிக்கப்பட்டிருக்கும்.
