சென்னை பல்லாவரம் தி.மு.க. சட்ட மன்ற உறுப்பினர் கருணாநிதியின் மகன், மருமகள் ஆகியோருக்கு பிணை வழங்க கூடாது என எதிர்ப்பு கிளம்பியுள்ளது.
மதுரையில் செய்தியாளர்களிடம் பேசிய எவிடென்ஸ் அமைப்பின் நிர்வாகி கதிர், சென்னை பல்லாவரம் திமுக சட்ட மன்ற உறுப்பினர் கருணாநிதியின் மகன், மருமகள் ஆகியோர், உளுந்தூர்பேட்டை திருநருங்குன்றம் கிராமத்தைச் சேர்ந்த தலித் சிறுமி ரேகா என்பவரை வீட்டு வேலைக்காக அழைத்துச் சென்று கடந்த 8 மாத காலமாக அடித்து உதைத்து சித்திரவதை செய்துள்ளனர்.
இதுகுறித்து புகாரின் பேரில், திருவான்மியூர் காவல்துறையினர் பட்டியல் சாதியினர் மற்றும் பட்டியல் பழங்குடியினர் வன்கொடுமை தடுப்புச் சட்டத்தின் வழக்குப் பதிவு செய்து, இருவரையும் கைது செய்தனர். அவர்கள் புழல் சிறையில் அடைக்கப்பட்டுள்ளனர்.
குற்றம்சாட்டப்பட்டவர்கள் மீது போலீசார் குற்றப்பத்திரிக்கை தாக்கல் செய்யும் வரை பிணை கொடுக்கக் கூடாது. பாதிக்கப்பட்ட சிறுமியின் கல்வி செலவினை ஏற்க தமிழ்நாடு அரசு உரிய நடவடிக்கை எடுக்க வேண்டும். மேலும், பாதிக்கப்பட்ட சிறுமியின் குடும்பத்தினருக்கு ரூ.10 லட்சம் நிவாரணம் வழங்க வேண்டும் என கதிர் தெரிவித்தார்.
