19 வயதுக்கு உட்பட்டோருக்கான ஆண்கள் உலகக்கோப்பை கிரிக்கெட் தொடருக்கான சூப்பர் 6 சுற்று அட்டவணை.
19 வயதுக்கு உட்பட்டோருக்கான ஆண்கள் உலகக்கோப்பை கிரிக்கெட் தொடர் நடைபெற்றுவருகிறது. இந்த தொடர் பிப்ரவரி 11 ஆம் தேதி வரை நடைபெறவுள்ளது.
இந்த தொடரில் லீக் சுற்று ஆட்டங்கள் நேற்றுடன் முடிவடைந்தன. இதையடுத்து ஒவ்வொரு பிரிவிலும் முதல் 3 இடங்களை பிடித்த அணிகள் சூப்பர் 6 சுற்றுக்கு முன்னேறின.
அதன்படி குரூப் ஏ-ல் இந்தியா, வங்காளதேசம், அயர்லாந்து அணிகளும், குரூப் பி-ல் தென் ஆப்பிரிக்கா, வெஸ்ட் இண்டீஸ், இங்கிலாந்து அணிகளும், குரூப் சி-ல் ஆஸ்திரேலியா, இலங்கை, ஜிம்பாப்வே அணிகளும், குரூப் டி-ல் பாகிஸ்தான், நியூசிலாந்து, நேபாளம் அணிகளும் முன்னேறி உள்ளன.
இந்நிலையில் சூப்பர் 6 சுற்றுக்கு முன்னேறி உள்ள 12 அணிகள் இரு பிரிவுகளாக பிரிக்கப்பட்டுள்ளன. அதன்படி குரூப் ஏ மற்றும் டி அணிகள் ஒரு பிரிவாகவும், குரூப் பி மற்றும் சி அணிகள் ஒரு பிரிவாகவும் பிரிக்கப்பட்டுள்ளன.
சூப்பர் 6 சுற்றில் ஒவ்வொரு அணியும் தலா 2 போட்டிகளில் விளையாடும். அதன்படி குரூப் ஏ-ல் முதல் இடம் பிடித்த இந்திய அணி குரூப் டி-யில் 2வது மற்றும் 3வது இடங்களை பிடித்த நியூசிலாந்து, நேபாளம் அணிகளுடன் விளையாடவுள்ளது.
இந்தியா – நியூசிலாந்து போட்டி நாளையும், இந்தியா – நேபாளம் போட்டி பிப்ரவரி 2 ஆம் தேதியும் நடைபெற உள்ளன.
சூப்பர் 6 சுற்று முடிவில் ஒவ்வொரு பிரிவிலும் முதல் இரு இடங்களை பிடிக்கும் அணிகள் அரையிறுதிக்கு தகுதிபெறும். அரையிறுதி ஆட்டங்கள் பிப்ரவரி 6 மற்றும் 8 ஆகிய தேதிகளிலும், இறுதிப்போட்டி பிப்ரவரி 11ஆம் தேதியும் நடைபெறுகின்றன.
