தி.மு.க அரசு பொறுப்பேற்றது முதல் தமிழகத்தில் பல்வேறு குற்றச் சம்பவங்கள் நாளுக்கு நாள் பல்கி பெருகி வருகிறது. இதை தமிழக பா.ஜ.க உள்ளிட்ட அரசியல் கட்சிகள் புள்ளி விவரங்களோடு தெரிவித்து வருகிறது.
இந்த நிலையில், திருநெல்வேலியில் 3 ஆண்டுகளில் 1,448 மைனர் பிரசவங்கள் நடைபெற்றது தகவல் உரிமை சட்டம் மூலம் தெரிய வந்துள்ளது.
அதாவது, அரசு விதிகளின்படி, 18 வயது நிரம்பிய பெண்கள் திருமண வயதை எட்டியதாகக் கருதப்பட்டாலும் 13 வயது முதல் 19 வயதுக்குட்பட்ட மைனர் பெண்கள் அதிக அளவு பிரசவத்துக்காக அரசு மருத்துவமனைகளில் அனுமதிக்கப்பட்ட சம்பவம் அதிர்ச்சி அளிக்கிறது.
திருநெல்வேலி மாவட்டம் முழுவதும், கிராமப்புறங்களில் பள்ளிப்படிப்பை முடித்த மாணவிகள், குடும்பச் சூழல் காரணமாகப் படிப்பை தொடர முடியாமல் 18 வயதில் திருமணம் செய்து வைக்கும் சம்பவம் நாளுக்கு நாள் அதிகரித்து வருவது பற்றி, தகவல் அறியும் உரிமை சட்டத்தின் மூலம் வெளி வந்துள்ளது.
இளம் வயதில் குழந்தை பெற்றெடுப்பதால், பெண்களுக்கு உடல் ரீதியாகவும், மனரீதியாகவும் பல்வேறு பிரச்சினைகள் ஏற்படுவதாக டாக்டர்கள் ஏற்கனவே தெரிவித்துள்ளனர்.
திருநெல்வேலி மாவட்டத்தில் மட்டும் கடந்த 2021, 2022, 2023 ஆகிய மூன்று ஆண்டுகளில் மட்டும் சுமார் 1,488 இளம் பெண்களுக்குப் பிரசவம் நடைபெற்றுள்ளது. இதில் 1,101 பிரசவங்கள் ஆரம்பச் சுகாதார நிலையங்களிலும், 347 பிரசவங்கள் அரசு மருத்துவக் கல்லூரி மருத்துவமனையிலும் நடைபெற்றுள்ளது தெரிய வந்துள்ளது.
இதில், மேலப்பாளையம் பகுதியில் உள்ள நகர்ப்புற ஆரம்பச் சுகாதார நிலையத்தில் மட்டும் சுமார் 88 குழந்தைகள் பிறந்துள்ளதாகவும், அதற்கு அடுத்தபடியாகப் புறநகர் பகுதியில் உள்ள மானூர் ஆரம்பச் சுகாதார நிலையத்தில் 44 பிரசவங்கள் நடைபெற்றுள்ளதும் தகவல் உரிமை அறியும் சட்டம் மூலம் தெரிய வந்துள்ளது.
இப்படி சட்ட விரோதமாக மைனர் பிரசவங்கள் நடைபெற்றுள்ள சம்பவத்திற்கு தி.மு.க அரசு என்ன பதில் சொல்லப்போகிறது என சமூக ஆர்வலர்கள் கேள்வி எழுப்பியுள்ளனர்.
