ஹமாஸ் தீவிரவாத அமைப்பின் உயர்மட்ட தளபதியை இஸ்ரேல் பாதுகாப்புப் படையினர் கைது செய்துள்ளனர்.
பாலஸ்தீனத்தின் காஸா நகரை தங்களது கட்டுப்பாட்டுக்குள் வைத்திருக்கும் ஹமாஸ் தீவிரவாதிகள், இஸ்ரேல் நாட்டின் மீது கடந்த ஆண்டு அக்டோபர் மாதம் 7-ஆம் தேதி ஆயிரக்கணக்கான ஏவுகணைகளை ஏவி தாக்குதல் நடத்தினர்.
இதை அடுத்து, ஹமாஸ் தீவிரவாதிகளுக்கு எதிரான போரை இஸ்ரேல் தொடங்கியது. விமானப்படை, கப்பல்படை, தரைப்படை என முப்படைகளையும் ஏவிவிட்டு நடத்தி வரும் தாக்குதலில் காஸா நகரமே உருக்குலைந்து போய்க் கிடக்கிறது. இந்த போரில் ஹமாஸ் தீவிரவாதிகளுக்கு சரியான பதிலடியை இஸ்ரேல் கொடுத்து வருகிறது. இந்த போரில் தற்போது வரை, 28 ஆயிரத்திற்கும் மேற்பட்ட பாலஸ்தீனியர்கள் உயிரிழந்தனர்.
ஹமாஸ் தீவிரவாதிகளுக்கு எதிரான போரானது நான்கு மாதங்களுக்கு மேலாகியும் நடந்து வரும் நிலையில், ஹமாஸ் தீவிரவாத அமைப்பின் உயர்மட்ட தளபதியை இஸ்ரேல் பாதுகாப்புப் படையினர் கைது செய்துள்ளனர்.
இதுகுறித்து இஸ்ரேல் பாதுகாப்புப் படையினர் வெளியிட்ட அறிக்கையில் கூறியிருப்பதாவது, ஜெனின் பகுதியில் வைத்து, ஹமாஸ் தீவிரவாத அமைப்பின் உயர்மட்ட தளபதியை இஸ்ரேல் பாதுகாப்புப் படை கைது செய்தனர். அவர் பெயர் உமர் பையத் என கண்டுபிடிக்கப்பட்டுள்ளது. இவர் இஸ்ரேல் படைகளுக்கு எதிராக தாக்குதல் நடத்தி உள்ளார். மேலும், பல தாக்குதல்களை நடத்தவும் திட்டமிட்டுள்ளார் என்று கூறப்பட்டுள்ளது.
