உலக டேபிள் டென்னிஸ் சாம்பியன்ஷிப் போட்டியில் இந்திய மகளிர் அணி 3-0 என்ற கணக்கில் இத்தாலியை வீழ்த்தி வெற்றி பெற்றது.
தென்கொரியாவில் உள்ள பூசன் நகரில் உலக டேபிள் டென்னிஸ் அணிகள் சாம்பியன்ஷிப் போட்டி நடைபெற்று வருகிறது.
இதில், ஆடவர் மற்றும் மகளிர் போட்டிகளில் இந்திய அணி இன்று அதிரடியாக விளையாடி வெற்றியை பதிவு செய்துள்ளது. இதனால் மூன்றாவது சுற்றுக்கு இந்திய அணி தகுதி பெற்றுள்ளது.
இதில், வெற்றி பெற்று காலிறுதி போட்டிக்கு முன்னேறும்போது, பாரீஸ் நகரில் நடைபெறும் 2024-ம் ஆண்டுக்கான ஒலிம்பிக் போட்டிக்கு இந்திய அணி தகுதி பெறும் என்பது குறிப்படத்தக்கது.
இதில், இந்திய பெண்கள் அணி இத்தாலி அணியுடன் விளையாடியது. இதில், இந்திய வீராங்கனை ஸ்ரீஜா அகுலா 3-0 என்ற செட் கணக்கில் நிகோலெட்டா ஸ்டெபனோவாவை வீழ்த்தி வெற்றி பெற்றார்.
இதனை தொடர்ந்து நடந்த 2 வது போட்டியில், உலக தர வரிசையில் 36வது இடத்தில் உள்ள, இந்தியாவின் முதல்தர வீராங்கனையான மணிகா பத்ரா, 3-0 என்ற செட் கணக்கில் கிரோஜியா பிக்கோலின் என்பவரை வீழ்த்தி வெற்றி பெற்றார்.
3-வது போட்டியில் இந்தியாவின் ஆய்ஹிகா முகர்ஜி, 3-1 என்ற செட் கணக்கில் கயியா மொன்பார்டினியை வீழ்த்தி வெற்றி பெற்றார்.
இதனால், இந்தியா 3-0 என்ற புள்ளி கணக்கில் இத்தாலி அணியை வீழ்த்தி வெற்றி பெற்றது. இந்தியா தனது அடுத்த போட்டியில் சீன தைபே அணிக்கு எதிராக விளையாடவுள்ளது.
