மதுபான கொள்கை முறைகேட்டில் நடந்த சட்ட விரோத பணப்பரிமாற்றம் வழக்கு தொடர்பான விசாரணைக்கு ஆஜராகும்படி டெல்லி முதல்வர் அரவிந்த் கெஜ்ரிவாலுக்கு 7வது முறையாக அமலாக்கத்துறை இன்று சம்மன் அனுப்பி உள்ளது.
டெல்லி மதுபான கொள்கை முறைகேடு, சட்ட விரோதப் பணப் பரிமாற்ற வழக்குகளில் ஆம் ஆத்மியின் மூத்த தலைவர்களான முன்னாள் துணை முதல்வர் மணிஷ் சிசோடியா, மாநிலங்களவை எம்பி.யான சஞ்சய்சிங் ஆகியோர் சிபிஐ, அமலாக்கத்துறையால் கைது செய்யப்பட்டு சிறையில் அடைக்கப்பட்டுள்ளனர்.
இதனிடையே சட்ட விரோத பணப் பரிமாற்றம் தொடர்பாக விசாரணைக்கு ஆஜராகும் படி, ஆம்ஆத்மி தலைவரும், டெல்லி முதல்வருமான கெஜ்ரிவாலுக்கும் அமலாக்கத்துறை தொடர்ந்து சம்மன் அனுப்பி வருகிறது. ஆனால் அரவிந்த் கெஜ்ரிவால், விசாரணைக்கு ஆஜராக தொடர்ந்து மறுத்து வருகிறார்.
ஏற்கனவே, கெஜ்ரிவால் பிப்ரவரி 2, ஜனவரி 19, ஜனவரி 3, கடந்த டிசம்பர் 21 மற்றும் நவம்பர் மாதத்தில் 2 சம்மன், என அமலாக்கத்துறை அவருக்கு 6 முறை சம்மன் அனுப்பி இருந்தது.
6 முறை சம்மன் அனுப்பியும் விசாரணைக்கு ஆஜராகாத அரவிந்த் கெஜ்ரிவாலுக்கு எதிராக சிறப்பு நீதிமன்றத்தில் அமலாக்கத்துறை வழக்கு தொடர்ந்துள்ளது.
இதுபோன்ற நிலையில், விசாரணைக்கு ஆஜராகும்படி கெஜ்ரிவாலுக்கு அமலாக்கத்துறை 7வது முறையாக சம்மன் அனுப்பியுள்ளது. அந்த சம்மனில் வரும் பிப்ரவரி 26-ம் தேதி அமலாக்கத்துறை அலுவலகத்தில் ஆஜராக வேண்டும் என தெரிவிக்கப்பட்டுள்ளது.
இந்நிலையில் 7வது சம்மனில் பிப்ரவரி 26-ந் தேதி கெஜ்ரிவால் ஆஜராவாரா? அல்லது கைது செய்யப்படுவாரா? என்ற எதிர்பார்ப்பு எழுந்துள்ளது.
