முதல்முறை வாக்காளர்களைக் கவரவும் 100 சதவீத வாக்குப்பதிவை உறுதி செய்யவும் வளர்ச்சியடைந்த பாரதத்தை உருவாக்கவும் நிகழ்ச்சித் திட்டம் வகுத்து செயல்படுத்த வேண்டும் என மத்திய இணையமைச்சர் டாக்டர் எல். முருகன் கேட்டுக்கொண்டுள்ளார்.
சென்னையில் இன்று நடைபெற்ற ஆகாச வாணியின் ஒலிபரப்பு வசதி நெட்வொர்க் பற்றிய தென்மண்டல ஆய்வுக் கூட்டத்தில் மத்திய அமைச்சர் எல்.முருகன் பங்கேற்றார். நிகழ்ச்சியில் உரையாற்றிய அமைச்சர், நவீன தொழில்நுட்பங்களைப் பயன்படுத்தி அனைத்து மொழிகளிலும் நிகழ்ச்சிகளைத் தயாரித்து மக்களிடம் கொண்டு செல்ல வேண்டும் என்பது அகில இந்திய வானொலியின் நோக்கம் என்றார்.
இதனை உணர்ந்து ரேடியோ ஜாக்கிகளும், பிரசார் பாரதி ஊழியர்களும் நிகழ்ச்சிகளை தயாரிக்க முன்வரவேண்டும் என்று அவர் கேட்டுக்கொண்டார்.
தூர்தர்ஷன் பொதிகை என்பதை தூர்தர்ஷன் தமிழ் என்று பெயர் மாற்றம் செய்யப்பட்டு நிகழ்ச்சிகளின் உள்ளடக்கத்தை மாற்றியிருப்பதன் மூலம் தமிழக மக்களின் எதிர்பார்ப்பை பிரதமர் நரேந்திர மோடி நிறைவேற்றியுள்ளதாகவும் அவர் குறிப்பிட்டார்.
மத்திய அரசின் சாதனைகள், மக்கள் நலத்திட்டங்கள் போன்றவற்றை கடைகோடி மக்களுக்கும் கொண்டு செல்ல வேண்டும் என்ற உயரிய நோக்கத்துடன் இமயமலைப் பகுதி உட்பட எல்லைப்பகுதிகளில் வானொலி ஒலிபரப்புக்கான அடிப்படை உள்கட்டமைப்பு மேம்பாட்டுக்கு பிரதமர் நரேந்திர மோடி, ரூ.2,500 கோடி நிதி வழங்கியிருப்பதை டாக்டர் எல் முருகன் நினைவு கூர்ந்தார்.
