2024 மக்களவை தேர்தலுக்கான முதற்கட்ட வேட்பாளர் பட்டியலை பாஜக வெளியிட்டுள்ளது. இதில் பாரத பிரதமர் நரேந்திர மோடி மீண்டும் வாரணாசியில் போட்டியிடுகிறார்.
2024 மக்களவை தேர்தல் விரைவில் அறிவிக்கப்படவுள்ள நிலையில் பாஜக தலைமையிலான தேசிய ஜனநாயக கூட்டணி தொகுதி பங்கீடு, வேட்பாளர் தேர்வு உள்ளிட்ட தேர்தல் பணிகளில் மும்முரமாக ஈடுபட்டுள்ளது.
இந்த நிலையில் பாஜகவின் முதற்கட்ட வேட்பாளர் பட்டியல் வெளியிட்டுள்ளது . டெல்லியில் உள்ள பாஜக தலைமை அலுவலகத்தில் செய்தியாளர்களை சந்தித்த அக்கட்சியின் பொதுச் செயலாளர் வினோத் தாவ்டே, 195 பேர் கொண்ட பாஜகவின் முதற்கட்ட வேட்பாளர் பட்டியலை வெளியிட்டார்.
இதில் 34 மத்திய அமைச்சர்கள் பெயர்கள் இடம்பெற்றுள்ளது. மேலும் 28 பெண்களும், 27 பட்டியலினத்தவர்களும், 10 பழங்குடியினர்களும், 57 ஓபிசி பிரிவினரும் இடம் பெற்றுள்ளனர்.
உத்தரப்பிரதேச மாநிலம் வாரணாசியில் பாரத பிரதமர் நரேந்திர மோடி மீண்டும் போட்டியிடுவதாக வினோத் தாவ்டே தெரிவித்துள்ளார்.
அதேபோல் மத்திய உள்துறை அமைச்சர் அமித்ஷா குஜராத் மாநிலம் காந்தி நகரிலும், பாதுகாப்புத்துறை அமைச்சர் ராஜ்நாத் சிங் லக்னோவிலும், தற்போதைய மக்களவை தலைவர் ஓம்பிர்லா ராஜஸ்தானின் கோட்டாவிலும் போட்டியிடுவதாக அறிவிக்கப்பட்டுள்ளது.
கடந்த தேர்தலில் ராகுல் காந்தியை அமேதி தொகுதியில் தோற்கடித்த மத்திய அமைச்சர் ஸ்மிரிதி இரானி, மீண்டும் அதே தொகுதியில் போட்டியிடுவாக தெரிவிக்கப்பட்டுள்ளது.
இதேபோல் மத்திய அமைச்சர்கள் கிரிண் ரிஜிஜு அருணாச்சலப் பிரதேசம் மேற்கு தொகுதியிலும், கஜேந்திர சிங் ஷெகாவத் ஜோத்பூரிலும், கிஷண் ரெட்டி செகந்திராபாத்திலும், ராஜீவ் சந்திர சேகர் திருவனந்தபுரத்திலும், முரளிதரன் ஆட்டிங்காலிலும் போட்டியிடுகின்றனர்.
விமான போக்குவரத்து துறை அமைச்சர் ஜோதிராதித்ய சிந்தியா குணாவிலும், சுகாதாரத்துறை அமைச்சர் மன்சுக் மாண்டவியா போர்பந்தரிலும், சர்பானந்த சோனாவால் லக்கிம்பூரிலும், பூபேந்திர யாதவ் ஆல்வார் தொகுதியிலும் போட்டியிடுகின்றனர்.
மலையாள நடிகரும் பாஜக நிர்வாகியுமான சுரேஷ் கோபி திரிச்சூரில் களமிறங்குகிறார். இதேபோல் பிரபல பாலிவுட் நடிகையும், பாஜக நிர்வாகியுமான ஹேமாமாலினி உத்தரப்பிரதேசத்தின் மதுரா தொகுதியில் 3-வது முறையாக மீண்டும் போட்டியிடுகிறார்.
மத்திய பிரதேச முன்னாள் முதலமைச்சர் சிவராஜ் சிங் செளகான் விதிஷா தொகுதியிலும், முன்னாள் மத்திய அமைச்சர் சுஷ்மா ஸ்வராஜின் மகளான பன்சூரி ஸ்வராஜ் டெல்லியிலும் போட்டியிடுகின்றனர். நடிகர் மனோஜ் திவாரி வடகிழக்கு டெல்லி தொகுதியில் இருந்து போட்டியிடுகிறார்.
நடிகை லாக்கெட் சாட்டர்ஜி ஹூக்ளி தொகுதியிலும், நடிகர் ரவி கிஷன் கோரக்பூர் தொகுதியிலும் போட்டியிடுகின்றனர்.
