கடலூர் மாவட்டம் பண்ருட்டியில் அமைந்துள்ளது புகழ் பெற்ற சுயம்பு ஸ்ரீஅங்காளி அம்மன் ஆலயம். இந்த ஆலயத்தில், மாசி மாதம் மயான கொள்ளைத் தீமிதி திருவிழாவையொட்டி, காப்பு கட்டும் நிகழ்ச்சி தொடங்கியது. விழா தொடர்ந்து மூன்று தினங்கள் கோலாகலமாக நடைபெறுவது வழக்கம்.
இந்த நிலையில், மாசி மாதம் மயான கொள்ளை தீமிதி திருவிழாவின் முக்கிய நிகழ்வான தீமிதி திருவிழா பயபக்தியுடன் நடைபெற்றது.
பக்தர்கள் காப்பு கட்டி, விரதம் இருந்து ஸ்ரீ அங்காளி அம்மன் வேடம் அணிந்து கையில் தீச்சட்டி ஏந்தியும், சக்தி கரகம் தூக்கியும், குழந்தைகளை மடியில் சுமந்தபடி அக்னி குண்டத்தில் இறங்கி தீ மிதித்து நேர்த்திக்கடன் செலுத்தினர்.
பின்னர், பாரம்பரிய முறைப்படி பம்பை உடுக்கை முழங்கப்பட்டது. அப்போது, பெண்கள் பக்தி பாடல்களைப் பாடியும், கும்மியடித்து ஆடியும் திருவிழாவை கொண்டாடி மகிழ்ந்தனர்.
நிறைவாக, ஸ்ரீஅங்காளி அம்மன் பச்சைநிற பட்டாடை உடுத்தி வண்ண மலர்களால் அலங்கரிக்கப்பட்டு, திருவீதியுலா வந்து பக்தர்களுக்கு அருள் பாலித்தார். விழாவில் கலந்து கொண்ட பக்தர்கள் அனைவருக்கும் பிரசாதம் வழங்கப்பட்டது.
