சபரிமலை ஐயப்பன் கோவில் நடை மண்டல பூஜை, விஷு, ஓணம் பண்டிகை மற்றும் பங்குனி உத்திரம் திருவிழா மற்றும் மகர விளக்கு பூஜைகளுக்காக திறக்கப்படும். இதனைத் தொடர்ந்து, ஒவ்வொரு மாதமும் 5 நாட்கள் திறக்கப்பட்டு பூஜைகள் நடைபெறும்.
அந்த வகையில், பங்குனி மாத பூஜை மற்றும் உத்திர திருவிழாவை யொட்டி சபரிமலை ஐயப்பன் கோவில் நடை வரும் 13-ம் தேதி மாலையில் கோவில் நடை திறக்கப்படும்.
கோவில் தந்திரி கண்டரரு மகேஷ் மோகனரு முன்னிலையில் மேல்சாந்தி மகேஷ் நம்பூதிரி கோவில் நடையை திறந்து வைக்கிறார்.
மறுநாள் 14-ம் தேதி முதல் 18-ம் தேதி வரைதினமும் அதிகாலை 5 மணிக்கு கோவில் நடை திறக்கப் பட்டு நிர்மால்ய தரிசனம், கணபதி ஹோமம், நெய் அபிசேகம் உள்ளிட்ட பூஜைகள் நடைபெறும்.
16-ம் தேதி பங்குனி உத்தர திருவிழா கொடியேற்றத்துடன் தொடங்குகிறது. அன்றைய தினம் காலை 9 மணி அளவில் தந்திரி கண்டரரு மகேஷ் மோகனகுரு கொடியேற்றி வைத்து 10 நாள் திருவிழாவை தொடங்கி வைக்கிறார்.
விழாவில் சிறப்பு பூஜையாக உத்சவ பலி நடைபெற உள்ளது. வரும் 25-ம் தேதி 10-ம் திருநாளில் பம்பையில் ஐயப்பனுக்கு ஆராட்டு நடைபெறும். அன்றைய தினம் மாலையில் கோவில் கொடியிறக்கப்பட்டு, 10 நாள் திருவிழா நிறைவு பெறும். அன்றைய தினம் இரவு பூஜைகளுக்கு பின்னர் கோவில் நடை சாத்தப்படும்.
