பழைய பல்லாவரத்தில் ஒரு கோடி பறிமுதல்! – நள்ளிரவில் வருமான வரித்துறை சோதனை!

பழைய பல்லாவரத்தில் நள்ளிரவில் நடைபெற்ற வருமான வரித்துறை அதிகாரிகள் நடத்திய சோதனையில் ஒரு கோடி பறிமுதல் செய்யப்பட்டது.

சென்னை பள்ளிக்கரணை அருகே, துரைப்பாக்கம் – பல்லாவரம் 200 அடி ரேடியல் சாலையில் உள்ள PLR Blue Metals என்ற ரெடிமிக்ஸ் கான்கிரீட் கம்பெனி மற்றும் ஜல்லி மணல் விற்பனை செய்யும் நிறுவன அலுவலகத்தில் நேற்றிரவு வருமான வரித்துறை அதிகாரிகள் சோதனையில் ஈடுபட்டனர்.

அதில் கணக்கில் வராத பணம் ஒரு கோடியை கட்டு கட்டாக பறிமுதல் செய்ததாக கூறப்படுகிறது. பணம் பறிமுதல் செய்யப்பட்ட நிறுவனம் பழைய பல்லாவரத்தைச் சேர்ந்த லிங்கராஜ் என்பவருக்கு சொந்தமானது என்று தெரியவந்தது.

நேற்று இரவு சுமார் 12.30 மணி முதல் அதிகாலை 3:30 மணி வரை வருமான வரித்துறை அதிகாரிகள் நடத்திய சோதனையில் ரூபாய் ஒரு கோடி சிக்கியது, அதை தொடர்ந்து லிங்கராஜ் வீடு, குவாரி என அவருக்கு சொந்தமான இடங்களில் நடைப்பெற்ற சோதனையில், மேலும் 1 கோடி பணம் பறிமுதல் செய்ததாக கூறப்படுகிறது.

நாளை நாடாளுமன்ற தேர்தல் நடைபெறவுள்ள நிலையில் இரண்டு கோடி ரூபாய் கட்டு கட்டாக பறிமுதல் செய்யப்பட்ட சம்பவம் பெரும் பரபரப்பை ஏற்படுத்தி உள்ளது.