புதுச்சேரியில் கழிவறையில் விஷ வாயு தாக்கி உயிரிழந்த 3 பேரின் குடும்பங்களுக்கு முதலமைச்சர் ரங்கசாமி நிவாரணம் அறிவித்துள்ளார்.
புதுச்சேரி ரெட்டியார்பாளையம் புதுநகரை சேர்ந்த செந்தாமரை என்ற மூதாட்டி, தனது வீட்டிலுள்ள கழிவறைக்குச் சென்றபோது அங்கேயே மயங்கி விழுந்தார். அவரது மகள் காமாட்சியும், பக்கத்து வீட்டு 15 வயது சிறுமியும் மூதாட்டியை காப்பாற்றச் சென்றபோது அவர்களும் மயங்கி விழுந்தனர்.
அருகிலிருந்தவர்கள் மூவரையும் மருத்துவமனைக்கு அழைத்துச் சென்ற நிலையில், செந்தாமரையும், காமட்சியும் வழியிலேயே உயிரிழந்தனர். சிகிச்சை பலனின்றி 15 வயது சிறுமியும் உயிரிழந்தார். இதேபோன்று, அதே பகுதியிலுள்ள மற்றொரு வீட்டிலும் கழிவறையைப் பயன்படுத்திய 2 பெண்கள் மயங்கி விழுந்தனர். அவர்கள் இருவரும் மருத்துவமனையில் தீவிர சிகிச்சை பிரிவில் சிகிச்சை பெற்று வருகின்றனர்.
இச்சம்பவம் தொடர்பாக மாவட்ட ஆட்சியர் குலோத்துங்கன் சம்பவ இடத்தில் ஆய்வு செய்தார். இதேபோல், முதலமைச்சர் ரங்கசாமியும் ரெட்டியார்பாளையத்தில் நேரில் ஆய்வு செய்தார்.
இதனைத்தொடர்ந்து செய்தியாளர்களை சந்தித்த அவர், பாதாள சாக்கடை இணைப்பு கொடுத்ததில் தவறு நடந்துள்ளதால், இது குறித்து ஆய்வு செய்ய அதிகாரிகளுக்கு உத்தரவிட்டுள்ளதாக கூறினார். மேலும், விஷ வாயு தாக்கி உயிரிழந்த மூதாட்டி மற்றும் அவரது மகளின் குடும்பத்திற்கு தலா 20 லட்சமும், சிறுமி குடும்பத்தினருக்கு 30 லட்சம் ரூபாயும் நிவாரணம் வழங்கப்படும் என தெரிவித்தார்.
