மகாராஷ்டிரா சட்ட மேலவையில் காலியாக இருந்த 11 இடங்களுக்கு நடைபெற்ற தேர்தலில் பாஜக கூட்டணி 9 இடங்களில் வெற்றி பெற்றுள்ளது. காங்கிரஸ் கூட்டணி வெறும் 2 இடங்களை மட்டுமே கைப்பற்றியது.
மகாராஷ்டிர சட்டப் பேரவையில் உள்ள 274 எம்எல்ஏக்கள் இந்தத் தேர்தலில் வாக்களித்தனர். மேலவைக்குத் தேர்வாக ஒரு வேட்பாளருக்கு 23 எம்எல்ஏக்களின் ஆதரவு தேவை.
எம்எல்சி தேர்தலில் பாஜக சார்பில் ஐந்து பேர், கூட்டணி கட்சியான ஷிண்டே சிவசேனா பிரிவு மற்றும் அஜித்பவார் பிரிவு தேசியவாத காங்கிரஸ் கட்சி சார்பில் தலா இருவர் என மொத்தம் 9 பேர் போட்டியிட்டனர்.
எதிர்க்கட்சியான காங்கிரஸ் மற்றும் உத்தவ் தாக்கரே பிரிவு சிவசேனா கட்சி சார்பில் தலா ஒருவர் போட்டியிட்டனர். இதேபோல, விவசாயிகள் மற்றும் தொழிலாளர் கட்சி சார்பில் களமிறங்கிய வேட்பாளர் ஜெயந்த் பாட்டீலுக்கு எதிர்க்கட்சிகள் ஆதரவு அளித்தன.
தேர்தலில் பாஜக கூட்டணியான மஹாயுதி சார்பில் போட்டியிட்ட 9 வேட்பாளர்களும் வெற்றி பெற்றனர். அதேவேளையில் எதிர்க்கட்சி வேட்பாளர்கள் மூவருக்கும் வெற்றிவாய்ப்பு இருந்த நிலையில், இருவர் மட்டுமே வென்றனர். ஜெயந்த் பாட்டீல் தோல்வியடைந்தார். இதன்மூலம் காங்கிரஸ் கூட்டணி எம்எல்ஏக்கள் கட்சி மாறி வாக்களித்தது தெரியவந்துள்ளது.
