கேரளாவில் புகழ் பெற்ற யானைகளுக்கு உணவு ஊட்டும் திருவிழாவில் ஆயிரக்கணக்கான மக்கள் கலந்துகொண்டு யானைகளுக்கு உணவு வழங்கினர்.
திருச்சூர் வடக்குநாதர் கோயிலில் ஆடி மாதம் முதல் தேதியையொட்டி யானைகளுக்கு உணவு ஊட்டும் திருவிழா கோலாகலமாக நடைபெற்றது.
இவ்விழாவில் திருச்சூர் மாவட்டத்தைச் சேர்ந்த 50க்கும் மேற்பட்ட வளர்ப்பு யானைகள் பங்கேற்றன. அப்போது வளர்ப்பு யானைகள் வரிசையாக நிறுத்தப்பட்டு அவற்றிற்கு மூலிகை கலந்த சாப்பாடு உருண்டைகள் வழங்கப்பட்டன.
முன்னதாக வடக்குநாதர் கோயில் மேல் சாந்தி செருமுக்கு ஸ்ரீ ராஜ் நாராயணன், குருவாயூர் லட்சுமி யானைக்கு சாப்பாடு உள்ளிட்டவற்றை வழங்கி திருவிழாவை தொடங்கி வைத்தார்.
இந்நிகழ்ச்சியில் யானைகளுக்கு 2 ஆயிரம் கிலோ அவல் உருண்டைகள், சாப்பாடு உருண்டை மற்றும் கரும்பு, தர்பூசணி, வாழைப்பழங்கள் வழங்கப்பட்டன. மேலும், விழாவில் கலந்துகொண்ட பொதுமக்களும் யானைகளுக்கு உணவு வழங்கினர்.
