தமிழக மீனவர்கள் மீது இலங்கை கடல் கொள்ளையர்கள் தாக்குதல் நடத்திய சம்பவம் அதிர்ச்சியை ஏற்படுத்தியுள்ளது.
நாகை மாவட்டம், வேதாரண்யம் அடுத்த ஆறுகாட்டுதுறை மீனவ கிராமத்தில் இருந்து சிவசங்கர், ராஜகோபால், தனசேகரன், செல்வ கிருஷ்ணன் ஆகியோர் கடலுக்கு மீன்பிடிக்க சென்றனர்.
கோடியக்கரைக்கு தென்கிழக்கே மீன்பிடித்துக் கொண்டிருந்தபோது இலங்கையைச் சேர்ந்த கடல் கொள்ளையர்கள் மீனவர்களின் படகை வழிமறித்து பயங்கர ஆயுதங்களால் தாக்கியுள்ளனர். மேலும், படகில் இருந்த 2 லட்சம் ரூபாய் மதிப்பிலான பொருட்கள் மற்றும் மீனவர்கள் அணிந்திருந்த நகைகளை பறித்து கொண்டு தப்பியோடியுள்ளனர்.
4 மீனவர்களும் அவசரமாக கரை திரும்பிய நிலையில், காயமடைந்த 4 பேரும் வேதாரண்யம் அரசு மருத்துவமனையில் சிகிச்சை பெற்று வருகின்றனர். இந்த சம்பவம் குறித்து கடலோர போலீசார் விசாரணை மேற்கொண்டு வருகின்றனர்.
