பெரியகுளம் அருகே முறையான சாலை வசதி இல்லாததால் டோலி கட்டி தூக்கி செல்லப்பட்ட பெண் சிகிச்சை பலனின்றி உயிரிழந்த சம்பவம் சோகத்தை ஏற்படுத்தியுள்ளது.
தேனி மாவட்டம் மேற்கு தொடர்ச்சி மலைப்பகுதியில் உள்ள வெள்ளகெவி ஊராட்சிக்கு உட்பட்ட சின்னூர் கிராமத்தில் முறையான சாலை வசதி இல்லததால் கிராம மக்கள் ஆற்றை கடந்து பெரியகுளம் சென்று வருகின்றனர்.
கடந்த ஒரு வாரமாக பெய்த கனமழை காரணமாக கல்லாறு மற்றும் குப்பாம்பாறை ஆறுகளில் வெள்ளப்பெருக்கு ஏற்பட்டதால் கிராம மக்கள் வெளியில் செல்ல முடியாத நிலை ஏற்பட்டது.
சின்னூர் கிராமத்தைச் சேர்ந்த மாரியம்மாள் என்பவருக்கு உடல்நலம் பாதிக்கப்பட்டதால், அவரை கிராம மக்கள் டோலி கட்டி தூக்கி ஆற்றை கடந்து சின்னையம்பாளையம் சென்றனர். பின்னர் அங்கிருந்த ஆம்புலன்ஸ் மூலம் பெரியகுளம் அரசு மருத்துவமனைக்கு அவரை அழைத்து சென்றனர்.
இந்நிலையில், அரசு மருத்துவமனையில் அனுமதிக்கப்பட்டிருந்த பெண் சிகிச்சை பலனின்றி உயிரிழந்தார். குறித்த நேரத்தில் அரசு மருத்துவமனைக்கு அழைத்து செல்லாததால் பெண் உயிரிழந்ததாக வேதனை தெரிவித்துள்ள கிராம மக்கள், சின்னூர் கிராமத்திற்கு முறையாக சாலை வசதியும், ஆற்றின் குறுக்கே உயர்மட்டம் பாலமும் கட்டி தரவேண்டும் என கோரிக்கை விடுத்துள்ளனர்.
