அமெரிக்க வாழ் தமிழர்களுடன் இருப்பது தமிழ் மண்ணில் இருப்பது போன்ற உணர்வை தருவதாக முதலமைச்சர் ஸ்டாலின் தெரிவித்துள்ளார்.
அமெரிக்காவின் சிகாகோ நகரில் நடைபெற்ற தமிழர் கலை நிகழ்ச்சியில் முதலமைச்சர் ஸ்டாலின் கலந்து கொண்டார். பட்டு வேட்டி, சட்டை அணிந்து வந்த முதலமைச்சருக்கு அமெரிக்க வாழ் தமிழர்கள் உற்சாக வரவேற்பு அளித்தனர்.
அப்போது நிகழ்ச்சியில் பேசிய அவர், அமெரிக்க வாழ் தமிழர்களுடன் இருப்பது தமிழ் மண்ணில் இருக்கக்கூடிய உணர்வை தருவதாகவும், சிறப்பான கலை நிகழ்ச்சிகள் ஏற்பாடு செய்தவர்களுக்கு நன்றி எனவும் கூறினார். மேலும், அமெரிக்க வாழ் தமிழர்களின் முகத்தை பார்த்துக் கொண்டே இருந்தால் போதும் என்று எண்ண தோன்றுகிறது எனக்கூறிய அவர், தமிழகத்தில் தாம் ஒரு நிகழ்ச்சியில் கலந்து கொண்டால் எப்படி இருக்குமோ அதை விட மகிழ்ச்சியான உணர்வை அனுபவிப்பதாக தெரிவித்தார்.
மேலும், தனித்தனி தாய் வயிற்றில் பிறந்தாலும் நாம் அனைவரும் உடன்பிறப்புகள் என குறிப்பிட்ட முதலமைச்சர், நம் எல்லோருக்கும் பாசத்தை ஊட்டிய தாய் தமிழ்த்தாய் தான் என கூறினார்.
