ஸ்ரீபெரும்புதூர் அருகே தனியார் பொறியியல் கல்லூரி முதலாம் ஆண்டு மாணவரை ராகிங் செய்து தாக்கியதாக 6 சீனியர் மாணவர்கள் மீது போலீசார் வழக்குப்பதிவு செய்துள்ளனர்.
காஞ்சிபுரம் மாவட்டம் ஸ்ரீபெரும்புதூர் அருகேயுள்ள தண்டலம் பகுதியில் தனியார் பொறியியல் கல்லூரி செயல்பட்டு வருகிறது. இங்கு ஆந்திர மாநிலம் நெல்லூரைச் சேர்ந்த விஷ்ணு சாய்ராம் என்ற மாணவர் ECE முதலாம் ஆண்டு படித்து வருகிறார்.
அதே கல்லூரியைச் சேர்ந்த சீனியர் மாணவர்கள் சிலர் அவரை ராகிங் செய்து வந்த நிலையில், கடந்த 23-ம் தேதி விஷ்ணு சாய்ராமை இருசக்கர வாகனத்தில் அழைத்துச் சென்று தனியறையில் அடைத்து வைத்து தாக்கியதாக கூறப்படுகிறது.
மேலும், அவரது வாயில் போதைப்பொருளை அடைத்து சித்ரவதைக்கு உள்ளாக்கியதாகவும், நடந்ததை வெளியே சொன்னால் கொலை செய்துவிடுவதாக மிரட்டியதாகவும் தெரிகிறது.
இதுதொடர்பாக மாணவர் விஷ்ணு சாய்ராமின் தந்தை ஸ்ரீபெரும்புதூர் டிஎஸ்பி அலுவலகத்தில் புகார் அளித்தார். அதனடிப்படையில் விசாரணை நடத்திய போலீசார் 6 பிரிவுகளின் கீழ் வழக்குப்பதிவு செய்து, தலைமறைவாக உள்ள சீனியர் மாணவர்களை தேடி வருகின்றனர்.
