தெலுங்கு பேசும் மக்களை பற்றி அவதூறாக பேசியதாக குற்றச்சாட்டு எழுந்துள்ள நிலையில் நடிகை கஸ்தூரி மன்னிப்பு கேட்க வேண்டும் என தமிழ்நாடு பாஜகவின் மேலிட பொறுப்பாளர் சுதாகர் ரெட்டி வலியுறுத்தியுள்ளார்.
பிராமணர்களின் பாதுகாப்பை உறுதி செய்ய வலியுறுத்தி சென்னை எழும்பூரில் நேற்று கண்டன ஆர்ப்பாட்டம் நடைபெற்றது. அதில் கலந்துகொண்ட நடிகை கஸ்தூரி பிராமணர்களின் உரிமைகள் பற்றியும், பாதுகாப்பு பற்றியும் பேசினார். அப்போது தெலுங்கர்கள் பற்றி அவர் தெரிவித்த கருத்துகள் பெரும் சர்ச்சையை கிளப்பியது.
இதற்கு தமிழ்நாடு பாஜக பொறுப்பாளர் சுதாகர் ரெட்டி கடும் கண்டனம் தெரிவித்துள்ளார். இதுதொடர்பாக அவர் வெளியிட்டுள்ள வீடியோவில், கஸ்தூரியின் கருத்து தமிழக மக்களிடையேயான ஒற்றுமையான சூழலை பாதிக்கும் என தெரிவித்துள்ளார். ஆகவே, தான் கூறிய கருத்தை கஸ்தூரி திரும்ப பெற வேண்டும் எனவும் வலியுறுத்தியுள்ளார்.
இதனிடையே தாம் கூறிய கருத்து திரித்து கூறப்பட்டுள்ளதாக நடிகை கஸ்தூரி விளக்கம் அளித்துள்ளார். இதுதொடர்பாக அவர் வெளியிட்டுள்ள எக்ஸ் தளப்பதிவில், சில ஊடகங்கள் தாம் கூறிய கருத்தை மாற்றி அவதூறாக பரப்பி வருவதாக குறிப்பிட்டுள்ளார்.,
தெலுங்கு பேசும் மக்கள் மீது தான் அதிக மதிப்பும் மரியாதையும் வைத்துள்ளதாகவும் குறிப்பிட்டுள்ளார்.
