ரத யாத்திரை மூலம் தேச பக்தியையும், ஹிந்து சக்தியையும் வளர்த்தவர் எல்.கே.அத்வானி – ஹெச்.ராஜா புகழாரம்!

ரத யாத்திரை தேச பக்தியையும், ஹிந்து சக்தியையும் வளர்த்தவர் எல்.கே.அத்வானி என பாஜக மூத்த தலைவர் ஹெச்.ராஜா தெரிவித்துள்ளார்.

அவர் விடுத்துள்ள வாழ்த்து செய்தியில், பாரதப் பெருந்தலைவரும், பாரதத்தின் முன்னாள் துணைப் பிரதமருமான, பாரத ரத்னா அத்வானி பிறந்த தினத்தில் அவரை வணங்கி மகிழ்கிறேன். ரத யாத்திரைகள் மூலம் நாடு முழுவதும் தேச பக்தியையும், ஹிந்து சக்தியையும் வளர்த்தவர்.

காங்கிரஸ் கட்சியை மட்டுமே மையப்படுத்தி இருந்த பாரதத்தின் தேசிய அரசியலை தனது ரத யாத்திரைகள் மூலம் பாரதிய ஜனதா கட்சியை நோக்கி திசை திரும்ப வைத்தவர்.

பாரதிய ஜனதா கட்சி இன்று அடைந்த உச்ச நிலைக்கு ஆரம்ப கால அச்சாரமாக விளங்கியவர். அவர் நல்ல ஆரோக்யத்தோடும், நீண்ட ஆயுளோடும் பாரதிய ஜனதா கட்சிக்கும், பாரதத்திற்கும் வழிகாட்ட எல்லாம் வல்ல இறைவனை பிரார்த்திக்கிறேன் என தெரிவித்துள்ளார்.

இதேபோல் அமமுக பொதுச்செயலாளர் டிடிவி தினகரன் விடுத்துள்ள வாழ்த்து செய்தியில், பாரதிய ஜனதா கட்சியின் மூத்த தலைவரும், நாட்டின் முன்னாள் துணைப் பிரதமருமான பாரத ரத்னா திரு.எல்.கே.அத்வானி அவர்களுக்கு எனது மனமார்ந்த பிறந்தநாள் வாழ்த்துகளை தெரிவித்துக் கொள்கிறேன்.

தேச நலனை மட்டுமே குறிக்கோளாய் கொண்டு செயல்படும் .எல்.கே.அத்வானி அவர்கள் நீண்ட ஆயுளோடும், பூரண உடல் நலத்தோடும் தொடர்ந்து மக்கள்பணியாற்ற எல்லாம்வல்ல இறைவனை பிரார்த்திக்கிறேன் என தெரிவித்துள்ளார்.