அமரன்’ போன்ற நல்ல திரைப்படத்தை தயாரித்த கமல்ஹாசன் மற்றும் வெளியிட்ட உதயநிதி ஸ்டாலினுக்கு பாஜக சார்பில் வாழ்த்துகளை தெரிவித்துக்கொள்வதாக மாநில செயலாளர் அஸ்வத்தாமன் தெரிவித்துள்ளார்.
செங்கல்பட்டு மாவட்டம் வண்டலூரை அடுத்த கொளப்பாக்கம் பகுதியில் தாமரை மலிவு விலை மக்கள் உணவகம் திறப்பு விழா நடைபெற்றது. இதில் பாஜக மாநில செயலாளர் அஸ்வத்தாமன், வடக்கு மாவட்ட பாஜக தலைவர் வேதசுப்பிரமணியன் ஆகியோர் கலந்துகொண்டு, ரிப்பன் வெட்டி உணவகத்தை மக்கள் பயன்பாட்டிற்கு திறந்து வைத்தனர்.
பின்னர் பேசிய அஸ்வத்தாமன், அல்லிக்கும், தாமரைக்கும் வித்தியாசம் தெரியாததால், பூங்கா குளத்திலுள்ள அல்லி மலரைப் பார்த்து தாமரை மலரவே கூடாது என அமைச்சர் சேகர்பாபு பயத்தில் உளறுவதாக விமர்சித்தார்.
தொடர்ந்து பேசிய அவர், ‘அமரன்’ படத்திற்கு எதிராக பேசுபவர்கள் இந்த தேசத்தில் வாழ தகுதியற்றவர்கள் எனவும், அவர்களை தேசிய பாதுகாப்புச் சட்டத்தில் கைது செய்ய வேண்டும் எனவும் வலியுறுத்தினார். அமரன் படத்தை தயாரித்த கமல்ஹாசன் மற்றும் வெளியிட்ட உதயநிதி ஸ்டாலினுக்கு பாஜக சார்பில் வாழ்த்துக்களை தெரிவித்துக்கொள்வதாகவும் அவர் கூறினார்.
