ஜார்கண்ட் சட்டப்பேரவைத் தேர்தலில் ஜார்க்கண்ட் முக்தி மோர்ச்சா தலைமையிலான கூட்டணி வெற்றி பெற்ற நிலையில், அக்கட்சியின் தலைவர் ஹேமந்த் சோரன் ஆளுநரை சந்தித்து ஆட்சியமைக்க உரிமை கோரினார்.
ஜார்கண்ட்டில் மொத்தமுள்ள 81 சட்டமன்றத் தொகுதிகளுக்கும் 2 கட்டங்களாக தேர்தல் நடத்தப்பட்டது. முதற்கட்டமாக கடந்த நவம்பர் 13ம் தேதி 43 தொகுதிகளுக்கும், 2வது கட்டமாக நவம்பர் 20ம் தேதி 38 தொகுதிகளுக்கும் வாக்குப்பதிவு நடைபெற்றது.
தேர்தலில் பதிவான வாக்குகள் நவம்பர் 23-ம் தேதி எண்ணப்பட்ட நிலையில் ஜார்கண்ட் முக்தி மோர்ச்சா தலைமையிலான இண்டி கூட்டணி 56 இடங்களை கைப்பற்றி வெற்றி பெற்றது. இதில் ஜார்க்கண்ட் முக்தி மோர்ச்சா 34, காங்கிரஸ் 16, ராஷ்டிரீய ஜனதாதளம் 4, மார்க்சிஸ்ட் லெனினிஸ்டு 2 இடங்களை பெற்றன.
இந்நிலையில் ஜேஎம்எம் செயல் தலைவர் ஹேமந்த் சோரன், ஜார்கண்ட் ஆளுநர் சந்தோஷ் கங்க்வாரை சந்தித்து ஆட்சி அமைக்க உரிமை கோரினார். இதன் பிறகு செய்தியாளர்களை சந்தித்த ஹேமந்த் சோரன், வரும் 28-ம் தேதி பதவியேற்பு விழா நடைபெறும் என தெரிவித்தார்.
