வேங்கை வயல் விவகாரத்தில், அறிவியல் ரீதியான ஆய்வுகளுக்கு பின்னர் தான், குற்றப்பத்திரிகை தாக்கல் செய்யப்பட்டுள்ளதாக தமிழக அரசு மதுரை உயர் நீதிமன்ற கிளையில் விளக்கமளித்துள்ளது.
புதுக்கோட்டை மாவட்டம் வேங்கைவயல் கிராமத்தில், குடிநீர் தொட்டியில் மனிதக்கழிவு கலந்த சம்பவத்தில் துரிதமாக விசாரணை நடத்தவும், இச்சம்பவத்தை கண்டித்து ஆர்ப்பாட்டம் நடத்தவும் அனுமதி கோரி உயர்நீதிமன்ற மதுரை கிளையில் பொதுநல மனு தாக்கல் செய்யப்பட்டது.
இந்த மனு நீதிபதி நிர்மல் குமார் முன் விசாரணைக்கு வந்தபோது, அரசு தலைமை குற்றவியல் வழக்கறிஞர் அசன் முகமது ஜின்னா ஆஜராகி, அறிக்கை ஒன்றை தாக்கல் செய்தார். அதில், வேங்கை வயல் விவகாரம் தொடர்பாக மொத்தம் 389 சாட்சிகள் விசாரிக்கப்பட்டு, 196 மொபைல் போன்கள் பறிமுதல் செய்யப்பட்டதாக தெரிவித்துள்ளார்.
மேலும் அந்த மொபைல் போன்களில் இருந்த புகைப்படங்கள், வீடியோக்கள், உரையாடல்கள் ஆய்வுக்கு உட்படுத்தப்பட்டதாகவும், வேங்கை வயல் பகுதியை சுற்றி இருக்கும் 87 தொலைத் தொடர்பு கோபுரங்களில் தொலைப்பேசி அழைப்புகள் ஆய்வு செய்து புள்ளி விவரம் எடுக்கப்பட்டதாகவும் தெரிவிக்கப்பட்டது.
இவற்றின் மூலம் கிடைத்த தகவல்கள் அடிப்படையில் தான் குற்றப்பத்திரிகை தாக்கல் செய்யப்பட்டதாகவும், வேங்கை வயல் கிராமத்தில் குடிநீர் தொட்டில் அசுத்தம் செய்தது, இரண்டு பேருக்கு இடையே ஏற்பட்ட பிரச்னை என்றும், அரசியல் காழ்ப்புணர்ச்சி எதுவும் இல்லை என்றும் வாதாடினார்.
மேலும் வழக்கில் அறிவியல் பூர்வமான ஆய்வுகளுக்கு பிறகே குற்றப்பத்திரிகை தாக்கல் செய்யப்பட்டதாக அரசு தலைமை குற்றவியல் வழக்கறிஞர் கூறியதை அடுத்து, மனுதாரர் மனுவை திரும்ப பெறுவதாக கூறியதை அடுத்து, வழக்கை தள்ளுபடி செய்து நீதிபதி உத்தரவிட்டார்.
